【曾智华专栏】香港乃“国际提款机”

今届遮打杯，公论，冇得跑！简直好英超水准对修顿小型球。

马王“桀骜之恋”摆明嚟香港揿钱，轻轻在提款机一按，就提走七百几万元（当然幕后下注而赢的更是惊人）。入到直路最后二百米，已恍似在无人之境，随时可以收工。

咁搞法，下年点呢？香港根本冇国际一级长途马，若继续容许外国马参加而冇得“炼”，等于年年向“外国势力”送钱，唔系几妥。

呢场小弟最冇瘾为见到“将王”毫无招架之力，丁点两届冠军风范都冇，应该玩完嘞。更弊，今次跑亚军的“表之五知”也已六岁，难再有进步空间。至于季军“当年情”，水准更差少少，再难勉强。

意即下年“遮打杯”，“外国势力”绝对有可能扫光所有奖金。咁点搞？

作为“提款机”，其实香港好易“揿钱”，尤其金融世界，只要国际大鳄有耐性又愿携手，真系好鬼易。大家可记得N年前一役？其实条“桥”可以再用又再用，只不过冇当年咁和味啫。

正是吼淡市先吸期指，再狂扫权重股，搞到个市大升，配合华尔街公关高手组织合唱团大户合奏，引散户入追权重股，升到咁上下，闪电将期指平仓，先赚一笔，再大手沽股票，又赚另一笔，你话几易搞？近期恒指由万四点铲上近二万点，有冇咁味道？少少啦。但我觉得班大鳄未玩完㗎！

明日沙田两场三级赛，第九场跑千二米好睇唔好买，有两只如日方中明星马在阵，皆因上次Easy Win已被疯狂加分。第一只是“嘉应高升”，希斯镇仓之宝，上次“行返嚟”赢，加十二分，但未跑过级制赛。另一为“贤者无敌”，上次胜出一级赛，攞命，加十五分。

明天睇吓边只输又点输，已好高娱乐性！