【曾智华专栏】是简炳墀的威力？

今次真真是：你问我，我问边个？

系乜？正是昨天早上，一个月一次理发，理发师W为极资深马迷，投注二十多年，对一切皆专注研究。每次皆会边理发，边与小弟谈马事，所作分析相当精准。昨日佢突然抛出一条问题：“碌
Sir，你有冇发觉，‘牙擦简’（简炳墀，五届冠军练马师）前年年初离世后，佢几个徒弟，包括叶楚航、徐雨石及丁冠豪，全部大跌Watt，尤其今季，简直惨不忍睹，究竟点解呢？叶楚航升正练马师时，曾威到赢冠军练马师，今季若冇‘大至尊’，一样沉底。究竟佢三个表现，有几多与牙擦简在世时，畀幕后指点有关？”

年轻马迷可能唔知，简炳墀绝对是马圈传奇人物，看似“一脚牛屎新界佬”，连广东话都唔正，但练马表现打倒不少过江龙，故能屡夺冠军荣誉，乜大赛都赢过。咁威，故此口没遮拦都冇人吹得佢胀，包括马会高层。

好嘞，若各方高人知点答W，通知我啦。

今晚跑快活谷，有一场必定好睇，正是第九场第二班跑千二米。

牌面告东尼两只最劲，“颜色大皇”今季大熟大勇，专攻千二米，得三W两Q两P，只一场冇奖金，四岁好体力，必须尊重。

另一匹为“八骏巨升”，上次失惊无神赢四个几马位，抛离胜出，被重手加十一分，可知在评磅员心目中分量，冇理由今次由龙变虫啩？

最古灵精怪为“好友心得”，明明快活谷千二米主场，今季四W两Q，上场突然走去跑沙田，几乎包尾而回，难道今场会变龙？

呢场我会𥄫住容厩的“晶晶日上”，今季只跑五场，冇W但全入前四，上次配潘顿一点七倍输死人，若论回马枪，就系佢嘞，一于做胆，拖三只又如何？