【曾智华专栏】与《恶女》惊人地相似

生活在香港，只要你“好奇”（即系够八），肯定会乐不可支，非常有充实感。日日都会无端白事弹出过瘾嘢，任何塘边鹤，处处都有大量生张熟李愿意汹涌地开“城市论坛”。

呢呢，前朝小弟如常夹叠报纸入地踎茶记，哗，但见班的士大叔，个个兴奋无比高谈阔论，水花四溅，讲到唔想开工咁款。

讲乜？正是七十六岁何伯闪婚内地妻。此Sexy个案，即时接住“李龙基痴恋内地女”花生骚，个个有自己看法，争住发表意见。

肥叔：“呢单嘢摆明𥄫住个阿伯啲财产啦，人哋成七十几岁仲黐埋去，贪佢够老咩！”

奀伯：“肥佬，又唔系咁讲㖞，可能冤枉人㗎，咪吓吓用阴谋论睇嘢啦。你我都七张几，仍行得做得，兼且单身，若有啱心水嘅，点解唔可以拉埋？唔通长者就冇真爱冇魅力？拍拖结婚有乜奇？点解一嘢就怀疑人？你咪小人之心啦！”

矮爷：“我都赞成。老友，我哋呢班七十几勾寂寞男人，若另一半已仙游，又或仔女又鸡飞狗走移晒民，咁突然有个愿意嘘寒问暖嘅温柔女性出现，为乜拒人于千里？喂，人嚟㗎。班仔女净系吼住我哋副身家，但平时影都唔见，点解要将钱留畀佢哋而唔畀爱我嘅人？成年人，一人做事一人当，就算真系畀人呃，都唔关三姑六婆八卦公事！”

小弟一边听一边笑，尤其矮爷所言，令我想起在Netflix睇到的《恶女》，哗⋯⋯内容竟然与今次呢单“何伯忘年恋”惊人地相似。

大家未睇过就快快睇，一定会令你开窍，知道睇事情，不可纯用自己角度就一厢情愿下结论，尤其你懂当事人的决定及感受吗？

讲到尾，一句概括——究竟关你乜事？