86岁余慕莲瞓唔到食唔落超忟憎：就嚟死喇 唔惯住护老院暴瘦惊现“鸡爪手”丨独家
因为家佣要返印尼探亲一个月，86岁无儿无女的余慕莲(鱼毛)被迫初体验护老院生活，面对晚上要着尿片、隔日由姐姐帮她冲凉，鱼毛姐周身唔聚财，瞓唔到又食唔落，住唔够一个月就瘦到皮包骨落晒形，被假新闻老屈加上冇得自由自在喺屋企翻睇《中年好声音2》更令她忟憎狂呻：“就嚟死嘞…”更因太闷，唔觉意大爆娱圈陈年秘闻。采访：方骞平 摄影：朱伟彦
3年前余慕莲患上肺纤维化及血液炎曾留医深切治疗部，健康每况愈下。为免行动不便的她独留家中会出意外，吴丽珠安排她入住一间位于港岛区，开业仅半年的新净护老院，鱼毛姐所住的是有窗双人房，环境及卫生都唔差。不过，《头条日报》记者往探望鱼毛姐，发现她冇晒心机及食欲，更暴瘦惊现“鸡爪手”。
闷闷不乐的余毛姐形容处于等死状态：“朋友陪我去食嘢，都食唔落，唔想去，医生话我过瘦唔够营养，叮嘱每日要饮3次营养奶。𠮶日覆完诊顺道返屋企交管理费，连保安都追问我‘点解瘦咗咁多？’我就答佢‘就嚟死喇！’”院方怕她跌亲，要求全日用尿片，但鱼毛话唔惯，只肯晚上用：“半夜急醒被迫屙落条片，有时唔止一笃，所以‘噏住’，几辛苦呢！因为瞓唔安个人变得好忟憎，个样残到唔想影相，仲出白发。”提到护老院生活，她透露隔日有姐姐帮女院友冲凉：“但咪搞！重要部位自己捽返，平时喺屋企都系自己冲凉，佣人姐姐只帮我着衫。”
《中年2》Fans爱古淖文
𠵱家鱼毛姐最挂住屋企：“可以自由活动，扶住去厕所，每朝落街踩自行车健身器，𠮶度啲公公婆婆好锡我，会帮我霸定位；仲久不久去附近戏院睇早场，想食乜就叫姐姐买…”她自爆最近喜欢能歌擅舞的古淖文，好想返屋企重温《中年好声音2》，又觉得《福禄寿训练学院》好好笑：“我冇煲剧，睇喊苦喊忽嘅剧会唔开心，自己都够惨啦，从来都冇人爱，细佬妹全部系同父异母及同母异父，有事揾家姐，冇事茄哩啡，最憎老母抛夫弃女嫁90几次，连上官玉都取笑过我‘你嫁唔去喇！因为你老母嫁埋你𠮶份…’唉！唔讲佢哋，会唔开心…所以决定将啲钱捐晒出去，仲打算同教友夹钱帮教会起教堂。”
睇新闻被屈越睇越忟
由于院友早睡早起，鱼毛姐带埋播音机听粤曲解闷，亦会靠手机上网打发时间，点知越睇越忟：“有啲报道好衰，话我以前穷到住㓥房及要问人借钱，𠮶啲死人头唔系记者系作者。”她坦言30几年前好悭，做完《欢乐今宵》都唔舍得坐的士回家，而且租住有5伙人的分租房：“我租𠮶间房几好㗎，有14吋电视机。”她又申冤：“我使鬼揾人借钱咩？只系我借钱畀人，我旺角间屋都值几百万啦。”鱼毛姐再爆某个老牌艺人曾经系佢债仔：“年前佢有病，但死要面住浸会医院，我都系入政府医院咋。每周医院追数时，佢就发脾气话‘都出唔到院点找数呀？’最后我帮佢碌住卡先，结果佢分期3年，每月还$2000。”鱼毛姐又爆某佢宠坏咗个仔，当年每次饮宴后都打包食物畀个仔，儿子已近20岁，“希望佢长命啲，佢死咗个仔唔知点算好。”
顶唔顺曾江超大男人
因为余毛姐好闷，讲旧史停唔到，除某个老牌艺人，亦顶唔顺已故曾江的大男人举动：“当年曾江中途加入《真情》当正自己系主角，剧中我饰演佢秘书，有钱又有学历，但竟然要求我对佢发姣，导演又唔敢逆佢意，真系讲多无谓，我唯有向监制提出，快啲写佢钟意好姨(薛家燕)，我就同好nice嘅 Joe Junior 。”另外，对住“深情探监KOL”李龙基亦冇乜好感，坦言难顶对方70几岁仲染粉红头：“离晒谱！佢最钟意揾𡃁妹，以前𠮶个女友都好后生。”
《星岛申诉王》推出全新项目“我要赞佢”栏目，现诚邀市民投稿赞扬身边好人好事，共建更有爱社区。立即“我要赞佢”︰https://bit.ly/3uJ3yyF
想睇更多精彩内容，请立即浏览“区区有申诉”活动专页，https://bit.ly/41hgS9E
紧贴最新最快新闻资讯，请立即下载星岛头条App：https://bit.ly/3Q29Vow
>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。
iPhone：https://apple.co/2IBi812
Android：https://bit.ly/2Pe8anu
>>>订阅【加拿大星岛网电邮快讯】，每天可收到最快新闻资讯电邮：
https://www.singtao.ca/subscribe/singtao.php
>>>立即关注加拿大星岛新闻网TG Channel，让加国新闻无遗漏全天候向你推送：
https://t.me/singtaoca
>>>订阅CCUE YouTube 频道，查看更多吃喝玩乐、生活资讯影片。
