【曾智华专栏】饱到晕低要抬走

香港极多日本菜迷，大部分钟情食Omakase，即无菜单料理，由主厨决定内容，不时不食，看看当日有乜新鲜就食乜也。
　　
今时今日要在香港叹一顿像样的厨师发办，收费随时“深不可测”，就似入咗香港著名“富豪医院”一样，出院才知“伤口有几深”！所以，大部分日本菜迷皆趁港元高企，扑去日本或台湾狂食，因平足一半！
　　
Omakase本为日本食制，但小弟前晚得到老友杨医生引领，来了一顿极精彩的广东菜厨师发办。
　　
杨医生乃著名食家，正牌唔正唔食一族，加上病人众多，偶会撞上顶级名厨，其中一位正是名震粉岭的“新汉记”老板兼名厨汉哥。汉哥巴闭在凡熟客使得起钱的，一律无菜单，总之，佢话食乜就食乜。
　　
基于江湖地位够兼搭通天地线，汉哥每日皆亲身走访各大市场及联系内地买手，有乜正嘢，先留货并第一时间通知。
　　
听汉哥大名久矣，但基于“新汉记”在粉岭联和墟，我去起码超过一小时，搭港铁要转车，又冇巴士到，由九龙出发未免太烦，故从未去过。
　　
如今杨医生号召，话明必有靓嘢食，咁去就去啦，“为食敢死队”十大汉，准时杀入粉岭。
　　
呢餐食咗乜？讲出吓亲，包括：白烚黑毛猪蹄筋、金牌虾酱骨、豆酱炒青瓜苗、手打九棍鱼饼、水果芹菜、麻辣牛胸油、盐水鹅、盐焗野生大花螺、蒸鲜搓墨鱼丸、红葱爆连墨汁鲜吊桶（一啖喷墨，险！）……至此，老友，只食完头盘矣，老老实实，我已经开始顶唔顺，要走出街外唞唞气，慢跑一个圈消化消化。
　　
跟住上仲有三斤半野生星斑、潮州鱼翅、白切新鲜走地鸡、爆膏奄仔蟹、甜品⋯⋯
　　
结果，几乎晕低要抬走。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。