周励淇4岁囝囝冧功超劲：佢话养我 公开教仔秘笈学做人紧要过识字丨独家
周励淇（Niki）于2018年12月宣布跟内地演员傅浤鸣结婚，2020年诞下儿子Morris，因为久违新作《超意神探》上映，靓妈兴奋受访，自爆被圈中人误会已息影，实情是疫情加上囝囝年纪细而减少工作。未做妈妈前，Niki一向唔多讲私事，但今时唔同往日，一讲凑仔就停唔到口，坦言好享受做妈妈，强调小朋友必定要有礼貌，又公开囝囝𠱁死妈妈的生活日常，更甜笑表示“真系好冧呀”。采访：杜杜 摄影：朱伟彦 场地:星影汇
Niki于疫情时拍摄《超意神探》，饰演心理医生“李慧蓝”，接拍原因是一直想合作，但未有机会合作的张家辉，她还大赞跟前辈有商有量演戏，过程相当愉快。自诞下儿子后，Niki工作量大减，她自爆早前出席电影导演会春茗，被不少圈中人误会已息影，“我冇息影，只系撞正疫情，小朋友又细，𠵱家开始我会接返多啲戏嘞！”
唔PO囝囝正面相有原因
Niki透露做妈妈后转变好大，更称这个演一世的角色责任很重，“真系唔容易，24小时，要练习耐性，又要同佢一齐学好多嘢，喺囝囝身上都了解多咗自己。”讲到对Morris期望，她只想囝囝是个开心正面的人，“三观要好正确，出到去会好受尊重，得人钟意，家庭教育好紧要，好似海绵咁吸收，大个好自然就有𠮶啲嘢。”
对于家教，Niki强调好严，特别重视囝囝要有礼貌，“冇礼貌去到边都唔得，佢知屋企有工人姐姐，都要去讲多谢、唔该，要执返自己嘅嘢，仲有望住人对眼打招呼，讲嘢唔可以郁嚟郁去。”Niki坦言唔担心囝囝的学业，但要佢早啲学识做个好人，“写字迟早都会识，但坏习惯好难纠正返。”另外教仔亦不会假手于长辈或工人姐姐，“家庭教育系父母，即系我身上，呢个角色系我制造出嚟，负返责任，我系好enjoy呢个角色。”她坦认因为老公要求故未有公开囝囝样貌，亦不想将来被囝囝埋怨，“等佢识得分先，自己post，我唔会阻止，但唔想未问过佢就摆出嚟，可能佢第时会怪我，唔想做啲嘢令自己后悔。”
一秒笑喊遗传演戏细胞
从Niki公开的唔见样照片，可见下月才足4岁的Morris相当高大，“佢未够4岁，好似6岁咁高。”Niki笑言有家族优良遗传，而且跟家姐周汶锜的两个囝囝似样，而性格就跟凑大他的婆婆最似，“我妈妈系上海人，好多嘢讲，阿仔识讲啲上海话，又系好多嘢讲。”另外，性格开朗的Morris是“问题儿童”，“佢系happy baby，好多嘢问，好多都唔识答，问到我有时怀疑自己，佢问我‘太阳去咗边度瞓觉’哈哈！好得意，佢知道月亮喺第2个星球嚟，又钟意睇科学嘢，话想做太空人，可能要报啲科学班畀佢。”Morris更遗传了父母的演戏细胞，“佢好drama㗎！一秒钟爆喊，一秒钟嘻嘻笑，唔做戏嘥晒。”听到妈咪要外出，Morris更会狂讲甜言蜜语𠱁妈咪留低，“佢会话‘你唔好去啦！你陪吓我啦！你去边啫！你唔好返工啦！’我话我唔返工你养我呀？佢又话‘我养你囉！我都可以去返工，等我大个啲，食多啲饭就可以养你’。”（其实几冧㗎？）系㗎！但系讲之嘛！哈哈！我即刻好理性咁话‘等你大个啲先啦’。”
5月18日是Morris生日，因跟母亲节相近，每年都会一齐庆祝，Niki更趁机教囝囝要锡妈咪多啲，“同佢讲‘你生日其实都关妈妈事，因为喺我个肚攞你出嚟’我有畀佢睇个疤，佢知道会好心痛，会问我‘你痛唔痛㗎？我帮你呵呵佢啦！’我话‘所以你要乖啲囉！你生日都系我好痛嘅日子，所以都要同我庆祝㗎！’后尾佢就话‘好啦！我同你一齐切蛋糕啦！”Morris要求今年生日会再以英雄人物为主题，不过原来他从未睇过相关电影，“Marvel系列𠮶啲英雄佢全部都钟意，但佢未睇过，全部都系我讲畀佢听，佢钟意睇书，未畀佢睇戏同平板电脑，电视睇指定儿童节目，每日半个钟，佢好珍惜𠮶半个钟，但系我知唔可以维持好耐，做得几多得几多囉！”
《星岛申诉王》推出全新项目“我要赞佢”栏目，现诚邀市民投稿赞扬身边好人好事，共建更有爱社区。立即“我要赞佢”︰https://bit.ly/3uJ3yyF
想睇更多精彩内容，请立即浏览“区区有申诉”活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。
iPhone：https://apple.co/2IBi812
Android：https://bit.ly/2Pe8anu
>>>订阅【加拿大星岛网电邮快讯】，每天可收到最快新闻资讯电邮：
https://www.singtao.ca/subscribe/singtao.php
>>>立即关注加拿大星岛新闻网TG Channel，让加国新闻无遗漏全天候向你推送：
https://t.me/singtaoca
>>>订阅CCUE YouTube 频道，查看更多吃喝玩乐、生活资讯影片。
