【曾智华专栏】由上而下悭钱KPI

任何现任或退休资深公务员，个个心知政府几乎所有部门，要找出可悭钱之处，多不胜数（唔识我可教你）！不过，若要佢哋公开讲，肯定人人弹开，耍手拧头。反之，你问在位负责人够唔够钱用，则死都话唔够，唔够人，唔够钱要求中央多拨资源开多位。此乃举世官场必然自私现象，屁股决定思维。
　　
点解咁？各为其主，各有利益也。正常情况下，部门首长要争取额外资源，极难。故此，凡已经到手的，必定死都唔放，就算你想放，你的下属都会嘈到拆天。
　　
咁点搞呢？得！若要悭钱、要Cut嘢，由上而下可也。特首司长局长身先士卒Cut，如此，下面各个部门，岂敢唔应酬？
　　
如今政府大大声呻穷，市民看在眼里，会否同情？不会！几时会？直至政府高层，包括行政会议所有成员，率先减福利、减人工，咁⋯⋯大家就会相信政府真的穷嘞。
　　
最有说服力，是现任政府首长级以上全部减薪，连前任的特首亦挺身而出，表示愿与市民同甘共苦，将办公室内无需要又豪华的花费，主动放弃或削减。
　　
最明显为董建华及林郑月娥，官场皆知，董先生的办公室根本长期空置，是否可按实际情况“酌情处理”缩减支出？
　　
另外，林郑月娥更令市民肉痛，究竟佢卸任之后，为香港做过乜（有冇㗎？），绝少人知，但纳税人替佢孭间甲级写字楼开支，几咁豪华、几重锤就人尽皆知。老老实实，若库房水浸，算啦，冇人会出声，反正大把钱任浪费，但家阵乜时势呀老友？点解我哋仍要年年花九百几万元畀“冇乜嘢做”嘅林太“办公”呢？唔明。
　　
麻烦现任、前任特首自己先做个悭钱KPI（关键绩效指标）。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。