【曾智华专栏】点解宁愿执笠？

香港近日突然兴讲执笠，不过根据小弟调查，有啲真执，有啲假执，有的“讲数执”。
　　
唔方便讲得太明，尤其是“假执”的，甚多盘算，总之就是幕后人决定“扮执”，这是商场的伎俩，在灰色地带中游走。
　　
而真执的，不少做到心灰意冷，又或睇唔到前景，计唔掂数，做生意求财，若冇财反蚀，点解唔执，难道撑下去当做善事？
　　
老友K叔的一间店则较特别，介乎真执与“讲数执”之间。
　
即系点？即系以目前条件挨下去，冇得做。因在大集团商场租约满，业主按例要求你大装修兼加租才续约，否则唔该起身。
　　
K叔叹话：“碌Sir，其实唔系冇生意，虽然成日话啲人上晒深圳，但若出品好，价钱合理，大家在港的仍要日日食，点会冇生意吖？不过，业主企硬兼多多要求，又唔减租，咁咪玩一拍两散囉！”
　　
K叔呻到树叶落，因在呢行多年，都未见过如此惨况，正是租加、食材加、人工加，但最离奇，揾唔到人做！
　　
“我出到八十蚊个钟都揾唔到楼面，连见工都冇，你话点搞？”
　　
“系呢，K叔，咪话市面执咗三千间嘅，一间十个工作人员，平均应该有三万人力释放出嚟揾工噃，点解冇人见工？去晒边呀？”
　　
谂落，一系执三千间的数字根本假嘅，一系大部分员工转行，咁转去边呢？难明。
　　
同K叔倾完，又撞到个经营物业管理老友大L，一开口就呻：“碌Sir，而家啲人好似唔使揾食咁，我公司长期请保安，夸张啲讲，会行的，会呼吸的，三尖八角的都请，但弊在个个做唔长，两嘢就走，个别话若散工就做，长工咪搞。”
　　
行行有本难唸的经，难怪不少人宁愿放钱在银行收息，唔做生意，香港咁行下去，会点？