【曾智华专栏】唔系唔惊，唔系咁惊

今日标题是否有点“玄”？你一定会问：“碌Sir，咁究竟你惊唔惊呢？”
　　
讲乜？大家应心照，就是近日人人不停猛讲的“香港空城”，执笠处处，吉舖如麻。兼且个个话北上消费抵到爆，似已成大趋势，个个搏命涌返深圳去。
　　
加上上周长假通街静到飞起，若再咁落去，唔使人哋搞你，你自己都玩谢自己。
　　
小弟作为传媒人，最喜欢分析城市脉搏，有几多系理性的、有几多系人云亦云的。另外，也思考各类社会现象产生的基本原因，无论正面、负面，是否暂时性的？
　　
先讲复活节长假期，香港打工仔，尤其大机构及公职人员，真真唔走就奇。
　
第一：告三日假变十日；第二：港元咁强（多谢美国佬带挈，加息加到美元猛升，但记住，咁搞法香港竞争力弱晒，唔内伤都几难），相比之下，边度都平，出外消费乃精明之举。
　　
好嘞，既然“出走消费”乃智慧决定，当然鸡飞狗走，结果一走就走百几万人，令成个香港静晒，现象绝非反常。弊在你有长假，但内地同胞冇，点涌落嚟“交换游客”呢？于是人与钱皆有出冇入，令香港损失惨重。
　　
你问我担唔担心？冇乜好担心，你睇住，一到“五一”，上边放长假而香港只得一日假期，到时你就会见到复活节时的相反现象，即广东道会逼爆玻璃，因越来越多高质素游客可来自由行。
　　
另外，香港是否真的出现执笠潮？Yes and No！就我所见及行内人告知，部分只是“假执笠”，幕后另有盘算也。
　　
简单，土瓜湾有间翠河餐厅，3月31日“执笠”，几日内已火速“装修”好，4月7日内望见到大军在部署重开，人物、装修相同，只换咗叫“荷里活”，你明点解吗？

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。