【曾智华专栏】大阔佬作风

交友无疆界，当然包括商界。
　　
商界系乜地方？龙蛇混杂，尔虞我诈，敌友不分，散聚以利为基础，兼且冇乜法治精神。总之，唔明显（甚至明显？）犯法就去马，游走在灰色地带等闲事，你唔敢？一定冇大富豪重用你，唔该考政府工。
　　
与商界CEO（并非大老板）或高层人灌两杯，好鬼多嘢听。原来个个大老板作风皆不同，有啲用钱大大方方，有啲坐拥几百亿元仍両両计较，孤寒到爆（N年前某黄姓地产商为典型）。
　　
有啲，最忌下属高调，功高盖主的话，一律杀无赦。所以，识做的一律识“隐形功”，永不会曝光。
　　
不过，有啲大老板则最喜欢低调隐形，最好你睇唔到我，你睇唔到我，平时屋邨阿叔款四围去， 以生前的波叔为典型。
　　
讲到唔怕下属有型高调，当今世代有一位，楷仔。佢最著名，自己揸Audi，下属坐“劳士”，一齐出发，唔识佢，分分钟调错身份。不过，喺香港，边个唔识楷仔吖。
　　
另外有位内地落难巨巨巨富作风也令人O嘴。当然行贿银行家及地方官亿亿声，故此，要钱有钱（银行多多都借），要地有地（官员多多都批）。
　　
来到香港与一众大富豪建立关系，也当然豪到你唔信。
　　
其中最令人津津乐道的，佢咁犀利，除银行家、地方官、大富豪（佢哋亿亿声买高息债券），个个搞到掂过碌蔗外，更连嫡系马仔也个个会替佢卖命。
　　
圈中故事，最夸张为佢曾指住山顶豪宅许下诺言：“X仔，若你卖屋卖旧Quota，呢间五亿山顶大宅就你嘅，放胆去做啦。”
　　
攞你心兼攞你命，有边个老板可以咁豪？无他，佢曾坐拥几万亿元，五亿元系乜 ！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。