【曾智华专栏】民生高官惨惨猪

政治大形势，《23条》顺风顺水通过，政府宣布由治入兴，全力拼经济，形势是否好简单？政策官员再冇后顾之忧，立法会将事事老奉通过？
　　
话你知，有啲必过，有啲必勾脚！
　　
前晚与几位现任及退休高官讨论官场大形势，现任高官B，呻到树叶落，苦过弟弟，灌完一杯又一杯。
　　
“喂B哥，乜事咁愁啊，人人都话如今立法会全部One Voice，非常齐心支持政府㖞。”
　　
“碌Sir，外边睇同政府之内的感受，差好远㗎。严格讲，比几年前有反对派更差！”B哥摇头苦笑，大口将杯中红酒一啖灌光：“以前呢，反对派议员占少数，基于佢哋乜都反，游说都嘥气，而建制派又与佢哋势不两立，客观上肯定够票通过大部分法案，所以，只需与建制议员有默契即可，就算议会上挨反对派狂闹，我哋可以当耳边风，反正闹又过，唔闹又过，吹乒乓乎？所以，当年唔恶啃。”
　　
“咁如今有乜唔同？”我真的好奇。
　　
“如今？首先加到九十位议员，单单记名都晕低，不少更是新手，唔熟游戏规则，但又心急抢曝光及博选票，所以可以好出位。”B哥分析大势：“嗱，你哋睇到嘅，某啲必定要归边法案，当然个个唔敢有异议，咪嗱嗱声过囉。不过⋯⋯唉⋯⋯”
　　
佢“唉”乜呢？原来班议员为争表现，积极化身为民请命，政治议题唔郁，个个走去郁民生议题，一有虚位即死咬唔放，锄到开花。于是有几个局就孭都应，包括文化体育及旅游、环境及生态、劳工及福利、运输及物流⋯⋯上亲去立法会，都预咗被议员当沙包砌来表演，不但大力“监察”，更分分钟申请乜都被弹返转头，因可以见报，话畀公众知——我在做嘢㗎！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。