【曾智华专栏】唔该你做马主啦

幻想中，做马主真是何其风光？你话嘞，养着只“大至尊”、“金鎗六十”、“加州星球”、“浪漫勇士”、“美丽传承”⋯⋯的话，何其威爆玻璃，名利滚滚而来？
　　
这个想法好正常，一如未做过生意者，凡准备自己或合股做生意，必定只谂Upside将会几美好，几时可以做到上市吸资。
　　
究竟有几多个冇经验的“天真马主”或“天真商人”，会完成梦想？又有几多个面对Downside情况出现时，懂得冷静处理？百中无一！
　　
所以，小弟若被老友问到应否养马时，必将养马激气/惨痛史一五一十分享，畀佢作心理准备，平衡下单边幻想做马主的兴奋。
　　
不过，人一世物一世，有能力的话，做次马主都几过瘾㗎。就算变冇瘾收场，都起码完成一个梦，试过！
　　
2024年马匹进口许可证抽签又快到，所有马会会员，符合基本资格的，都可以入纸。
　　
首先第一关是显示自己有财力，提供银行文件，证明最少备有一百二十五万港元资金。呢个“抽签”，我用引号，因N年前开始从无透明度，唔似六合彩搅珠，公众真系睇唔到点抽。所以，你会发觉有啲人年年入纸，年年抽唔到，另外则有一堆名人年年入纸，年年中，个中“秘密”心照不宣。
　　
不过，今年“新人”抽中机会肯定大大提升。点解？大佬，今日经济实况系点，你知我知。究竟有几多人可以攞一千几百万元买只马，再月月用七、八、九万元去养？
　　
我隐隐听见有声音：“唔该大家做马主啦。”
　　
今晚继续“跑闷马”，全泥宴，但闷都照玩。二班千二米必精彩，因只只有往绩，问题只在幕后“去唔去”。
　　
呢场黎、蔡各出两只而“晶晶日上”必大热，一于用佢拖“四季醒”、“紫云冰”及“魅力宝驹”！