【曾智华专栏】约“老友记”食饭要留意

同辈老朋友自知“食得一餐得一餐”，必须把握机会享受相聚时光，故此纷纷成立老同事、老同学、老兄弟⋯⋯老乜老物组，按时聚会，大吃（仲得唔得？）大喝（更少人得！），开心一下。
　　
呢类食饭组通常轮流做东，轮流决定食乜及边度食，结果发现有点弊！
　　
弊乜？原来并非个个做东者皆思虑周详，以致出问题。
　　
我辈七十岁或以上，通常健康现象，除三高糖尿眼蒙耳聋外，最普遍为筋骨收缩及痛风、骨骹退化等症状，故此，个别开始用枴杖，死顶唔用的，也可能举步维艰，行一步痛一步。
　　
不过，并非人人如此，约三分一老友仍可健步如飞。呢呢，咁就出问题，因行动自如者做东道时，只会研究目标食肆好唔好食，完完全全冇谂对行动不便者可会有困难。
　　
举例，港岛区正正有三间著名的食肆，对膝盖关节痛或行动乏力者，造成大问题。
　　
第一间陆羽茶室，地下订到位仍可，但若需到二、三楼，就要挨一道又一道楼梯，其苦况绝非正常行动者能想像。
　　
另一间也在其附近，摆花街一号的碧俪苑，在斜路顶段，冇公共交通可到达。若由皇后大道中行上，脚部有事者就似受刑。更甚，又系要爬两层楼梯，小弟提议负责人Ben哥：“你的菜式如此出色，一于搬啦。因现在格局，赶走好多长者客㗎。”
　　
事实，我很少在那里请客，有点遗憾。
　　
另一间出现同样问题的，为湾仔船街米芝莲推介船记，叉烧好味到会飞，但又系要挨两道楼梯才可抵达。
　　
前晚又杰，老友约在中文大学崇基学院教职员餐厅晚餐。落咗东铁，仍要爬十多分钟斜路及楼梯，真系食龙肉都冇味啦。