【曾智华专栏】朝令错，夕速改

全世界政府都要制定政策，官员不过是人，当然会有错，也有思虑不周的时候。

目前政府运作难知，但以前的，制订任何政策，必会在内部大辩论，再咨询业界，然后AO互锄，肯定冇乜得衰才推出。若再衰，负责官员就下台或调职可也，以免祸及“大老细”孭上身。
　　
不过，若遇着个专横老细，也会霸王硬上弓，一意孤行，由上而下。如此，死火就大件事，当要由下属或下任执“苏州屎”。
　　
远的不讲，近二十年的，最佳例子是“孙九招”，唔卖地、停建公屋斩断供应，咁点？你睇到，我睇到，即时香港楼市供求失衡，遇上零息加经济大好，再加外地人到港炒楼，于是楼价火箭式上升。终于，后悔时已经太迟，因一块地由生变熟，拍卖后起楼，冇七、八年唔成事，点搞？唯有用辣招税夹硬揿，将全香港楼市扭曲，搞到经济乱晒大龙。
　　
另两例子，“明日大屿”及垃圾收费，摆明冇充分经内部及业界甚至全港辩论，所有出事位未研究清楚就去马。死得！上届政府定下的，今届立即领嘢，点收科？小弟睇，个垃圾征费计划就算拖到8月，仍必一镬泡，希望我唔中啦。
　　
上届政府留下的另一堆“苏州屎”，也实在离谱。由上而下一锤定音（我的内线指出，曾多次“死谏”前特首咪搞），意图用此博取民意，将两蚊鸡坐车降到六十岁。
　　
派钱容乜易？但应唔应该咁派法？另外，个黑洞有几深，你考虑过吗？
　　
终于，上任期满，拍拍屁股去，本届就接波，两蚊鸡搭车2023至2024年度已升到四十二亿元，下年度预算更火箭式上到六十三亿元，深不见底，年轻纳税人孭死，非常不公平。
　　
呢个“朝令”摆明错，必须立即“夕改”喇！