【曾智华专栏】典型谷气大马主

马主有好多种，最受练马师欢迎的，当然是“美丽系”的郭氏家族那种，不停买呀买，一只唔得，换第二只，不少马房都有“美丽马”，不但撞埋一日出，更不时同场会一齐出。若果马会有大量郭氏家族型马主，咁就唔使担心到震晒嘞。
　　
不过，现实中并不多。幸而马主界正如官场——有人辞官归故里，有人漏夜赶科场，如此才会生生不息，延续赛马事业。
　　
其实就多年所见，辞官者的际遇及心态，数十年如一日，小弟乃其中之一。上周与一位前大马主T叔晚饭，大家际遇相近，佢一讲起养马，就呻到树叶满地，摆明谷到上心口。
　　
T叔于上世纪八十年代到2000年，生意因香港经济大好，财源滚滚，揾钱易过借火，于是想一过其马主瘾。
　　
“碌Sir，我当年对马圈一切无知，只觉得做马主好威，可以呼朋引类，带齐亲朋戚友及生意拍档入场拉头马，几咁风光！”
　　
结果，佢揸住近千万元做本，托练马师买马，一买几只，每只百几万元。
　　
“坦白，我乃生意人，当然不会天真，早早预咗畀练马师斩三两成马价，应该嘅，不过，大佬呀，你唔好点到我陀陀拧，冇晒面吖嘛！”
　　
乜事？正是大部分水鱼马主的经验——练马师话只马唔使买时就爆大冷，令亲友以为马主收埋食；好嘞，到练马师话“得”𠮶次，当然Call齐老友瞓落去。大镬！原来又瓜直，变替人“孭飞”！又畀老友M到飞起，怎不火都嚟？
　　
马主T际遇，N咁多人领教过㗎！
　　
今日沙田赛事，我有兴趣研究一只马，贺贤三班跑千二米的“攻顶”，获优先出赛权。此马上季跑过两次沙田千二米，一次W，一次包尾。今季第一次再跑千二米，一于买十蚊，睇佢W定冇影！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。