【曾智華專欄】臨場執生的重要性

小弟上世紀七十年代加入廣播界，負責大量台前幕後電視及電台直播。師傅教落：「阿Luke，做Live，最重要識得執生，知冇？」
　　
乜叫「執生」？即在直播時，可能出現事先無法預計的突發情況，切勿慌張手忙腳亂，要即時就現場環境及形勢判斷，再決定怎樣改變，以令節目繼續順利播出。
　　
例如N年前負責直播《城市論壇》，就試過有人在現場自殺、拿武器衝上台、現場打交⋯⋯坐在控制室（廣播車）內，我就要指揮現場工作人員執生行事，將不能出街的畫面全部Cut去。
　　
講返賽馬，任何報章馬評人畀貼士及衡量形勢的稿，要早一至兩日交稿。其時未能掌握馬匹最新狀態，亦未知幕後人出擊意欲，也未睇到「外邊圍觀者」（專落大飛神秘人）的重錘目標，一切只可用客觀數據去分析。
　　
但一到開賽當日，最新資料全部有齊，包括練馬師王走勢（馬會操盤手極準）及騎師出擊意欲（大馬房及前領騎師多會連珠爆發），另外，「落飛族」手影也非常明顯。
　　
上周日賽事，本欄只能畀隔夜貼士，「女皇銀禧紀念盃」四隻——「金鑽貴人」、「神虎龍駒」、「錶之銀河」及「幸運有您」。
　　
開賽前一睇，告東尼「練馬師王」次熱，第一場已殺W，「美麗多盈」六倍勝出。近日告仔頻頻大手出擊，當日第九場更誇張到出四隻，肯定部署連珠爆發。「紀念盃」閘前，「幸運有您」二十五倍，冇票，嘥氣。立即臨場執生，飛之，改要「加州星球」。
　　
結果？中Q及二重彩，冷到共分一千七百幾元！
　　
今晚再捧告東尼四隻，全部相信不會大熱，可以WP下注，包括「美麗奔馳」、「美麗歡聲」、「八駿巨昇」及「柏林探戈」。第八場出三隻，擺明有布局，唔會講玩！