【曾智华专栏】英文水准齐齐堕退

老友H叔退休后无所事事，终日攞住架小米手机（佢话爱祖国，用国货，悭啲唔用iPhone），在旺角太子街头四围猎影。经常捉到不同部门“大食懒”，讲咗唔做，又诈盲诈聋，除咗派牛肉干最积极外，大部分街头不合理事情，负责部门多数都用“我睇唔到，我睇唔到⋯⋯”态度，除非有人唔怕烦，正式投诉。
　　
昨日佢又传来一张经常阵阵尿味的街角告示，由康乐及文化事务署发出，有盖章，意即上司睇过（Approval After Vetting）。
　　
“碌Sir，呢张嘢又揾唔到钱，又冇乜好玩，应该并非呃人假货。事实呢处啲尿味实在好恶顶，相信不少人投诉后，阿Sir才勉强出手做嘢！”H叔分析：“不过，骑骑骑，小弟都算读过吓大学，有基本英文文法及翻译常识，相信康文署啲阿Sir都有啩？下级唔够班啫，批出嘅上司，都应该有一定水平吓嘛？”
　　
讲乜？正因佢一睇张告示，就知有问题，因告示写：“严禁随处便溺，违例者会被检控！No Urination. Offender will be Prosecute！”
　　
我将此告示掟上百厌星群组（有大状、传媒老顶、医生、退休高官、教授⋯⋯），反应“哄动”（平日闷到抽晒筋）！
　　
最多人玩的，当然是“Urination”代表乜？因与便溺好似冇百分百等号。
　　
其次，文法当然错晒，中学生也应知。
　　
较好笑为马王P，佢以赛马来形容香港的英文水准：“碌Sir，简直急剧堕退呀！”
　　
Y医生接口：“冇法，如今够胆上国际传媒顶吓的，来来去去得叶刘。你叫传统爱国阵营班大哥大姐‘挺身而出’？个个要耍手拧头。刚刚在英文台听见某资深爱国女议员论《23条》，答：‘HongKong will become more safer！’”
　　
当大家水准都下降时，就冇“水准高低”问题啦。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。