【曾智华专栏】全港马路是“政府金矿”

上周四鸡啼咁早，一踏入茶记，已听到成班的士大哥拆天咁嘈，当然粗口满天飞，摆明要发泄！
　　
肥A：“哗，真系闻所未闻！政府做服务就话有KPI（工作成效指标）啫，哗，原来捉人犯法都有？有冇搞错呀？”
　　
高B：“肥A，你噏乜呀？未听过警察拉人有指标㗎㖞，难道鼓励人犯法再拉？未够数就鼓励多啲人打劫、行窃、非礼、行骗⋯⋯冇人犯法，世界和平，唔好咩？”
　　
矮C：“B佬，肥A讲嘅，系我同你不停食嘅牛肉干呀，懵佬！真荒谬，原来财政司司长年年开出个‘估计’，每年应该抄几多，列‘政府收入’㗎。老老实实吖，抄牌咁乞人憎，若冇KPI，我做警察都侧侧膊啦，点解要做丑人，破坏警民关系㖞？”
　　
肥A：“咪系囉。一有指令，唔愿做都要做，原来一年派出牛肉干超过三百万张，库房收入近十亿元。所以，4月开始又醒定喇，因为新财政年度，警方当然想尽快‘达标’，以免唔够数，临尾追到气咳！”
　　
高B：“成日有啲凉薄友话：‘唓，你班友，想唔畀人抄牌，咪唔好非法泊车囉。’我一听就想质拳佢叹（好暴力，讲吓好喇），香港司机十之七八其实都想守法，点会冒险收三百二十元牛肉干咁变态？问题系，你政府车牌就大量发，收牌费收到‘嘭嘭声’，但批车位就远远不成比例，咁系乜意思先？”
　　
矮C：“乜意思？意思就系两边食尽。车牌猛出先收一笔，‘逼’你非法泊车抄牌，再斩一笔，咁都唔明，你新嚟㗎咩？”
　　
听完班大哥呻之后，小弟几乎立即中招。因到土瓜湾街市买鸡翼，谂住一分钟搞掂，望望街头街尾冇警察，即跳落车。说时迟，那时快，已有人大嗌：“抄牌呀！”咦，咁鬼“幽灵化”㗎，边处突然飘出嚟嘅呢？　

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。