【曾智华专栏】大佬唔好啩？

今日标题是否很吸引？你一定在想，佢叫边个做大佬呢？又有乜要求大佬唔好啩？
　　
等小弟细说因由啦！
　　
话说两个月前，约“快乐传媒老是佛”到相熟的鲗鱼涌嘉里中心“富嘉阁”晚餐，食到中途，负责人李文基师傅（百分之九十九似足二十年前李嘉诚的样子）笑笑口，攞咗块古董龙趸皮出现：“碌Sir，呢块嘢好珍贵㗎，刚够十二个人食，胶质超劲，烩鲍鱼一流，我唔留啦，你攞去做善事啦！”
　　
好㖞，召集为食善长乃我强项！翌日立即通过旗下地盘公布。闪电咁快有人举手认捐三万元，再付费食一席“古董龙趸皮”盛宴。
　　
基哥知道后，来电话：“要2月底前食㗎，之后我放大假，唔知放几长㗎！”
　　
吓？咁即系点？退休？拉闸⋯⋯冇理由㖞，咁鬼多熟客，生意唔忧，点解呀？
　　
四围打听，富嘉阁真系将有大变动，但日期及最终如何，仍在研究中，据闻大老板两代有不同意见，在拉锯。
　　
此店面积相当之大，若非由一个人决定点用，必有不同意见，包括𠝹开做几间精品餐厅，吸纳年轻客路，这想法肯定有参与决策者提出。
　　
不过，若咁做，基哥当然不会上马再管，一方面年纪唔细，另一方面，佢乃“鲍鱼一哥”首徒，最擅长做粤菜，若搞到只得细细间或改做什么Fusion菜，咪变英雄无用武之地？
　　
无论如何，决定未落，但极大机会将会转型，若不，或先结业再研究。小弟大班为食老友一听此消息，当然冇晒瘾，唯有立即举手排队，几大收档前叹返几餐。个个指定要食基哥最拿手的顺德拆骨鱼云羹、烟燻樟茶鸭、墨西哥大鲍鱼烩鱼唇、古法砂锅焖头腩⋯⋯
　　
我真系一面写，一面流口水呀！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。