【曾智华专栏】“贺年杯”反高潮

龙年第一次见面，恭祝大家龙马精神，身体健康，长年得享马照跑的大乐趣！
　　
旧历年尾最令香港人冇瘾的，为“美斯收天价斋睇波”事件。呢单嘢背后当然有不少“议程”，幕前幕后按计划演出矣。
　　
无奈，搞盛事，香港要靠人，即“寄人篱下”，若冇做好预防，分分钟衰嘢要监生吞。这次当买个教训啦，唔系人人都会按国际礼貌畀面你㗎。
　　
其实香港本土每年已有好多国际盛事，若再谷一谷，就能去到更高层次，例如本身已相当成功的香港国际赛马日。
　　
对马会，政府一直只紧张收几多博彩税，以及有需要绕过立法会揾钱时（例如起西九博物馆），就去揿马会，其他时间则有点冷漠。
　　
可能政府高层冇乜马迷，更冇乜边个知道赛马事业能为香港带来几多潜藏利益。
　　
澳门、新加坡赛马相继宣布冚旗，因搞得差，在国际马坛完全不成气候。
　　
但香港唔同，已经有马匹冲出香港，扫下国际极高荣誉，例如“浪漫勇士”。之后政府有冇做嘢？冇！相比运动员攞奖牌的大锣大鼓庆祝，完全两种心态。
　　
Hello Hong Kong唔识“卖”香港赛马，真冇眼光！
　　
讲返今日赛事，“贺年杯”非常反高潮，跑一班，只得六匹马报名，嘥气！
　　
基于跑第六都有奖金，即今场搞笑到包尾输ML（多个马位）、爬返终点的都有钱分。既然咁，点解报名仍如此冷落？若大家唔想“贺年”，不如明年取消咗佢嘞！
　　
拆局！呢场伍厩出三只，可以全盘“操控”赛果。若三只唔去，或决定边只只跑第四，如此就二三四重彩畀佢决定晒，何其荒谬？牌面好奇，最低分的“绿族无限”似冇得输，咁二重彩复式一拖五，博爆冷脚啦！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。