【曾智华专栏】真真假假，假假真真

上周日全香港马迷、球迷经历咗真真假假、假假真真的一日。
　　
当日下午开心死，因有双料娱乐。一方面欣赏近月斗志鲜明、士气如虹的香港队，出战国际迈亚密。当中最令人振奋为落后一球后，众将仍死拼，终半场打和，四万球迷欢声响彻云霄。
　　
另一方面，香港经典一哩赛也同时举行，准马王“骄阳明驹”潇洒表演。
　　
点解假假真真、真真假假呢？
　　
首先讲波。迈阿密真的来了，也真的入了几球。假的？当然是美斯及苏亚雷斯称有“炎”，一分钟都唔落场。你系球迷，唔闹爆就奇。
　　
其实美斯由落机一刻，已摆出个又攰又残又厌恶款，根本唔想嚟香港。点解？只有佢自己知。但迈亚密衰到连一分钟都唔放美斯出场交代一下，只称有“炎”唔踢得，令我辈球迷真想兜脚伸班主碧咸落大西洋，因今铺摆明“呃钱”！
　　
讲返马。“骄阳明驹”当然真跑，根本其他对手冇得跑，睇嚟今季做马王也绝不出奇。
　　
呢场奇在潘顿好似真系想撼一撼，故十年唔逢一润，搞到要罚停赛。以佢同竞赛小组的长年“信任互动”，罚停赛？罕见到唔多似真！
　　
最过瘾，跑第三的是全场最低分的“久久为尊”（唔爆一爆，三、四重彩边有咁好分？），只得六十四分，跑“赢”比佢更高分的六只马，究竟评磅员的评分有几“真”呢？又或出战的马跑得有几“真”，竟才可输畀最低分马？
　　
今晚快活谷赛事，最有兴趣研究最长途二二○○米一场。牌面马而又有往绩的，包括“奇妙年华”、“庆万家”及“国大合”，决定全部飞起。要另外三只，“梦照发”、“同宝宝”及“一支箭”，全部未跑过同程，但相信头马必在其中，买Q及PQ啦！