【曾智华专栏】轻微案件，政府“重伤”

近日围内老友茶余饭后，都攞一宗法庭案件来搞笑。边宗？主角正是我哋老友、前个人私隐专员黄继儿大状的轻微交通事故案。
　　
好嘞，而家判完可以公开讲啦。
　　
点解我哋呢班“百厌老人”觉得单案咁鬼好笑呢？乃因黄大状在香港法律界极具盛名，不少人争相揾佢打案。事实佢经验丰富，更做过律政处。打案即“打波”，清楚球例及相关人物特性者，胜算当然高啲啦，故佢案件接不停。
　　
以黄大状级数，接单大案，来个开案陈词都要过百“粒””啦，咁嘅身价，岂会“胡乱出招”？
　　
原来错！话说去年4月中一个晚上，老黄在沙宣道与域多利道交界回旋处，与前面的士轻微碰撞，佢车在后，一般当然输晒。
　　
小弟也是驾驶者，遇上冇伤人案，通常都会一人行一步，私下和解。
　　
不过，不少的士司机的做法是有错无错，落车即粗口大骂，啱晒咁款。我的处理方法简单：“师傅，斯文人，唔好讲粗口，想唔想报警畀阿Sir处理？”
　　
通常对方一听报警，即窒一窒，因十之七八有不小心驾驶纪录，若自己也有错，又唔肯和解，分分钟会再被告，如此，多立即收火，攞返个彩算数。
　　
黄大状个案，的士司机正是夸大案情，狮子开大口，搞到老黄㷫爆玻璃。好！就同你玩大佢，亲自上庭盘问证人，盘问完司机，再盘问交通警。结果裁判官何慧娴裁决时，直指的士司机夸大供词，证据显示两涉事车辆根本冇乜损毁，遂判黄大状不小心驾驶罪名不成立。
　　
有趣的是，如此一单轻微交通案，因当事人为大状，律政处也要外判大状做主控。老友，今次纳税人冤枉喇，起码冇咗百几“粒”！