【曾智华专栏】机管局发债似阿伯……

上周四又到“为食敢死队”每月聚餐，大家照例就近日香港种种现象喷口水，不亦乐乎。
　　
座中有金融专才、大状、前高官、教授、传媒高层、医生⋯⋯上晒岸的财务自由人。
　　
倾到七时左右，突然个个手机弹出信息，一睇，大部分抓头，冇晒瘾咁款呻：“顶⋯⋯佢个头锤，有冇搞错？今铺真系点盐唔咸，点糖唔甜，得啖笑，嘥Gas，下次唔玩嘞！”
　　
班大哥讲乜呢？正是上周四机管局三跑债券公布认购结果，于是银行及财务机构第一时间通知申请客户，派到几多手。
　　
今次有十七万五千份有效申请，总认购额近一百六十亿元，较总发行额五十亿元超购二点一倍。中签者最少可分得两手。但无论你掟几多钱去申请，也一律最多只分得三手。
　　
意即你就算掟过百万元去抽，也是中三万！
　　
座中“金融P”最㷫，因佢正正大拿拿用一百五十万元去抽，谂住博得几多得几多。
　　
其实作为“金融专才”，“金融P”真系儍儍哋。因精算师推断，今次正常最多每人分得三至五手，八手已算“奇蹟”。所以，点“幻想”好，都只应用十万元去抽。
　　
呢呢，小弟正是如此。不过，仍觉冇瘾。搞到身水身汗，将钱调来调去，才得三万，意即揸足全期，才有不足三千二百元利息。
　　
你话啦，中三手都系每季只有三百一十八元利息，够乜啊？
　　
最抵死为大状K：“呢单机管局发债，似足我哋长者去殊殊，绝不畅快，窒吓窒吓玩滴滴仔。你发债，即要钱使，点解唔发多啲？如今又唔系派福利，发债即向人借钱，人哋肯借畀你，就借多啲啦，大家好嘛。发咁少，求其揾个券商都可以包起啦，真系有啲多余！”