【曾智华专栏】饮食业有个大蓝海

简单问题，今时今日边个年龄层人口最多，而且会越来越多？儍嘅都识答——长者，即五十五岁以上，每年以十万计递增。
　　
咁长者通常有乜普遍问题，但又唔多想讲的呢？女的，我唔识答；男的，当然是下面开始唔生性，力度日比日弱。
　　
即是——细时一支箭，老时一条线。因膀胱肌肉松弛，加上前列腺发大，小便日渐冇力也。轻则要慢慢谷，重则“滴滴仔”，鞋头湿晒。
　　
故此，正常现象，入到男厕必定见到尿兜之下有大滩尿。你估个个唔想射准啲咩？但心有余而力不足嘛，无法啦。
　　
好多夫妇拗颈嘈交正由此起。宁愿就老婆大人的，会放下男性“樽盐”，坐下小便，我选择拒绝，咁点？每次小完便，自己抹返！
　　
今日讲呢个话题，因发觉不少食肆决策人蒙查查，面对一个大大生意蓝海都唔识开发，这正是老年男食客的蓝海！
　　
食肆成功，当然有多方面原因，包括装修、气氛、服务、出品、价钱⋯⋯但有几多老板能领略，若自己餐馆有一个令年长男客人放心又安心“殊殊”洗手间的重要性呢？
　　
老老实实，第一，男人都要私隐，若你排尿兜无遮无掩，硬要大家排排企一齐“殊”，点都有啲心理障碍，去得唔畅快。
　　
更甚，五十几岁开始个个前列腺发大，谷尿时间已经要长，若再旁边有人企住，肯定会加大“窒度”，呢吓冇人会坦白相告，但大家心照！
　　
所以，若食肆有个令“老男人”小便有安宁舒服感觉的洗手间，一定大大加分（但冇人明显话你知）。
　　
其实唔难搞，只要尿兜之间有个略高的间隔，已经非常理想。唔识？你去又一城戏院，参观吓佢个男厕啦，设计攞足一百分㗎！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。