【曾智华专栏】“安慰剂”堆填胃

香港人个胃，尤其上年纪的，不少已变“安慰剂堆填胃”。原因？其实你知我知，乃由于人口老化，大家都衰退，但又唔想面对，于是听吓呢个𠮶个专家（有的有牌，有的扮嘢）乱点，就日日吞N种“健康产品”。呢类嘢其实大部分有如做医疗实验的“安慰剂”，食你唔坏，但唔会医好你，心理上感觉良好矣。
　　
互为影响下，一般人越来越信要吞“补充剂”，市场越搞越大，由于并非药物，不受监管，各路“掠水族”你出我又出，揾明星做代言人，大卖广告狂谷。
　　
既然卖得起价钱，连锁药房当然大量入货，狂赚上架费，搞搞吓，阻地方又冇乜利润的货品（例如潄口水），被逼让路。
　　
我也曾被某某“另类医疗”专家“忠告”（即系老点），话要一日食十几种草本药，又话排毒，又话防癌，总之乜都得。
　　
食咗半年，大佬呀，钱就使咗，完全唔觉有乜增强体质或疾病远离之类效果，做完老衬，立即停止再食。
　　
其实排毒容乜易，多多食菜，朝朝食只熟大蕉，再加鲜奶及大量水，立即乜毒都排清。
　　
补充营养？消委会早早指出食用“真实食物”加饮食均衡，已有足够营养。
　　
小弟以上两样日日做，加上正面思维，自我减压，立时免疫系统加强，疾病远离。
　　
当社交场合中人交换食乜乜物物“补充剂”时，除非问我，一概冇意见，费事踢爆。第一，此乃庞大金矿，不少人靠佢揾食（由出品到广告到传媒到营销⋯⋯），一条龙养好多人㗎；第二，既然食的又觉心安理得，冇不良反应，我咁多口做乜呢？
　　
正如个个七嘴八舌研究买乜“金融产品”时，难道我次次踢爆话啲嘢系揾你钱，而并非替你揾钱咩？好Anti Social啫。