【曾智华专栏】“政府队”快示范表演

作为几十年公务员，小弟深知任何政策，政府公开讲咗而做唔到的话，官场文化之内，乃非常大镬的瘀事。负责官员自己冇晒面外，必连累上司替你孭。如此，上司孭完后，为免下次再濑嘢，唯有移走主责者。今次会否就发生？大家睇多几个月啦，我估会！
　　
再讲一次，垃圾分类及征费，百分百是个应做的政策。香港社会作为国际金融中心，强调自己是先进城市，有乜理由推动环保大堕后？讲出来都面红啦。
　　
事到如今点搞？
　　
“政府队”一定要瞓身出击，做个示范，话畀全香港市民知：“唔系冇得搞，若我得，你唔做，就系你揾借口唔搞！”
　　
之后再坚实推行再执法，反对声音必弱得多。
　　
乜叫“政府队”？即政府控制的一切范围。首先由政府总部开始，再到各个政府部门。各个部门阿头在自己建筑物内，严格执行新政策。
　　
“政府队”也包括政府可以控制的所有机构，全港资助机构、学校、社区中心、康体场地、医管局医院诊所⋯⋯
　　
最重要是房屋署责无旁贷，必须身先士卒，将全港公共屋邨变为“环保大厦”典范。房屋署有一切资源、人手及权力去应付唔合作的居民，问题在是否由下而上，再由上而下去马，支持呢个事在必行又属全港大利益的环保政策。
　　
当“政府队”全军出击，主动做，积极做，自然会成为全城示范。
　　
再者过程中全港公职人员（公务员及出政府粮一族），皆必须履行责任令政府成功，如此才产生巨大推动能量。
　　
早前小弟清楚指出，呢场仗必须由政务司司长陈国基亲身挂帅才掂，若只由环境局单打独斗，肯定继续一镬泡！