【曾智华专栏】畀伟仔佢都唔敢攞

任何圈子，涉及表演的，必有两个公认水平。第一个是“看台公认”，即不用专业判断，一般观众睇一睇，已知你有冇料到。
　　
第二个高一点层次，是“行家公认”。即你过咗公众一关，已去到专业层次，但仍会有高低之分，正是行家一出手，便知有没有！
　　
历届的奥斯卡、金球奖及香港电影金像奖，绝少（几乎冇）有机会爆大冷，因全由行内专业团体评分。一个评判可能有私心乱嚟，但由众多电影工作者工会选，结果好难离晒大谱。若真的出现不受公众及行家认同的赛果，得奖者都面懵懵唔好意思上台啦。
　　
小弟想讲乜？正是上周六本报娱乐版头条大字标题——《梁朝伟吴慷仁亚洲电影大奖争帝》，睇此标题时，刚刚一啖奶茶入口，几乎喷返出嚟。点解？因为“争帝”两字套咗黄色，煞有介事，好似真系半斤八両有得争咁款。
　　
各位若睇过《金手指》及《富都青年》，相信必定同意，两套片内的男主角的表现水平，哗哗，差好远啫。
　　
系呀，梁朝伟是公认影帝，但在《金手指》内演技如何，相信由普罗大众到佢自己都心里有数。喂，点可以用呢套电影提名争影帝呀？
　　
而佢对手吴慷仁，金马奖前从未攞过影帝衔，但在《富都青年》内的极高境界演技，不但放在香港、台湾，甚至冲出亚洲去到奥斯卡级数，都冇得输！我有冇过誉？你睇过就明白！
　　
人头博芋头，3月10日当《第十七届亚洲电影大奖》揭晓日，你就知，根本冇可能唔系吴慷仁坐上影帝位。
　　
夸张啲讲，若我系梁朝伟，必会日日求神拜佛咪爆大冷中奖，因肯定被嘘爆，到时点敢上台接受影帝荣衔？未面懵过乎？