【曾智华专栏】有跑Vs.冇跑

认真的马迷，必定会以严肃态度投入赛事，努力做功课，尤其是睇片！仔细研究，因每场马阵上都可能发生不少难测因素，影响马匹的发挥及名次。马匹大热倒灶，可能是意外，也可能是人为（唔去）。意外包括大漏闸、踩氹、马匹发脾气唔跑⋯⋯与骑师无关。
　　
人为呢，你知我知，呢家嘢最擅长是“软硬鞭”，总之佢总能度出古灵精怪而竞赛小组又儍吓儍吓信佢的理由甩身（例如听到有人叫我）。
　　
从睇巡逻影片中，大家好易睇到边只马及边个骑师“有跑”与“冇跑”，又或纯输在意外。
　　
讲返今季冠军练马师，人人话早已分胜负，因伍鹏志赢足一条街，其他人根本冇得追。
　　
我同意伍鹏志的确劲，但话Sure Win又未必！系呀，志仔已超过四十场头马，其他对手则仍是二字头。不过，睇睇伍厩子弹已用得七七八八，而冚手的未用新马多未成熟，应留下季，所以后半季佢好难仍嘭嘭声大幅继续放领。
　　
故此小弟睇好蔡约翰，随时一发力就如飞杀上，过志仔头！
　　
众所周知，蔡神仙子弹无限，精品不绝，因大把马主捧钱畀佢任使，如此，无数马贩当然争相“巴结”佢，当神咁拜，最好的马优先预留。
　　
今日神仙开始发力喇，出九只，当中六只可W可P，必须以佢为投注重心。
　　
“一定美丽”、“精算谋略”、“健康快车”、“金榜之星”及“豪堡”之外，另有一匹上次肯定冇跑过，正是蔡约翰练马师赛马团体的“铁金刚”。
　　
上次十五倍冷门，潘顿出闸在尾，纯试马，入到直路，又撞落其他马屁股，又阿吱阿咗，最后自动标上，只输两个多马位。
　　
今日神仙全军出击，当以呢只为缆趸，我一于瞓十蚊鸡落去！