【曾智华专栏】叹完及第粥后见“状元”

上周日赛事，小弟畀的贴士一登出，已被N咁多老友或WhatsApp或社交平台留言窒到飞起，兼盘盘冷水照头淋，尤其“牙刷苏”，更在入闸前来电：“肥碌，你比‘聚才’，二十二倍，‘状元及第’就更离谱，二十五倍，根本冇人落飞，真系跑出我就跟你挽鞋！”
　　
哗，佢老哥使唔使咁上心呀？小弟只下巴轻轻贴两只马WP对碰，十蚊注，输晒都系四十大元，咪话唔肉痛，蚊咬感觉都冇啦！
　　
呢类让磅级制赛，本栏已多次分析，十之七八至八九爆冷。因高分马唔会在呢类场合博，而唔博，得佢自己幕后知道，分分钟赢大钱也。今季咁多场同类赛事，老友，有冇热门W过呀？强如“加州星球”都伏匿匿啦。
　　
所以，三级赛“洋紫荆短途锦标”当然如是，问题爆边只。而要爆就必须杰挞挞，只有如此，一齐做戏的“演员”才有肉食！
　　
一千米直路，好虾人及马跑，因步速怪鸡，故应首选同程有往绩胜出纪录的。呢场有“维港智能”及“贤者无敌”孭晒飞。我逐只研究，咦！“状元及第”今季已出三场一千米直路，一Q两第四，非常准，只要有决心郁手，必可入围，故才胆粗粗，连二十五倍也照贴。结果竟然赢到冇得跑，以一个马位弹离一千米王者“贤者无敌”！
　　
好啦，今晚又有一场让磅三级赛“一月杯”，当然又系爆的格局。睇睇报名，罗厩三只，东厩又三只，冠军必在其中！
　　
罗厩出马房王牌一百一十三分的“发财先锋”，要孭一百三十四磅，摆明畀路自己马房轻磅马去杀！边只？推断是“越骏欢欣”！此马仍在上升轨，配级制让磅赛杀手巴度，似嘞。
　　
大家可翻阅资料，各马房出击高班冷马，皆用巴度，因佢骑技高而不常赢，骑乜都分多几蚊也！