【曾智华专栏】港铁快停“左行右企”

昨日讲到任何公共政策必须因时制宜，应随大形势而修改，甚至取消。
　　
最鲜明例子，今天全港市民肯定不会赞成（除咗商业利益挂钩者）个乜乜“明日大屿”计划，如此，就应立即学前特首董建华𠮶招——我唔玩八万五嘞，一二三正式宣布放弃大屿山填海，将供求关系扶回正轨，令地价不再急泻！
　　
另一个公共政策，也应是时候放弃，以免出现悲剧！这正是港铁推行多年的“左行右企”政策。
　　
这政策原意是将扶手电梯分两边，唔赶的在右边企定定，让出左边通道，畀赶时间的快步上或落。
　　
咪畀我讲中，若港铁再坚持执行落去，好快会出事！
　　
小弟经常搭港铁，不时目睹危险情况。假若人流稀疏，大家悠悠闲，当然冇问题。不过，一旦遇上繁忙时间，个别人士超心急，一系冲上，一系冲落，尤其冲落的，险象环生！见过卤莽者，竟推开前面行得慢乘客，咁搞法，分分钟前面𠮶个先仆低，再人叠人齐齐冧。
　　
其实你冲落一条电梯，快得几多？十秒？二十秒？冲到落去，一定会刚刚有车埋站畀你上？
　　
我看，是若港铁取消左行右企，人群流动的效率会更快，因更易疏通人群。
　　
一部扶手电梯，假若右边企满五十人而左边腾空，最多同时畀十几人快速通过。
　　
相反， 废除左行右企，如此，一条电梯即可企一百人，究竟边种政策更有利乘客？更快疏散人群？
　　
今日公开要求，港铁高层若唔想自己孭上扑槌决定，咁就做个乘客调查，群众智慧自然会度出应该点做。
　　
再讲一次，如今乘搭港铁的，乜人都有，未必个个斯文守礼，若不幸推跌一个人而重伤，就大镬㗎啦！