【曾智华专栏】冇晒胃口，大屿早唞

制订政策有时好难，有时好易，有时要经过精密调查科学化计算，有时呢？一眼就睇得出应该点做、应该嗱嗱声做！
　　
例如掟天文数字走去冇雷公咁远填海，冒掏空库房的风险搞“明日大屿”计划，就真系儍嘅先会坚持做！
　　
高官唔好坐喺象牙塔顶谂嘢，得闲走去地踎茶记问吓牛头角顺嫂之流，已知有冇人会支持呢个“大愚计划”。
　　
过去几年香港的变化有目共睹，包括：
　　
一、冇乜人生仔，新人口越来越少；二、整体高速老化，即会越来越多人拜拜；三、十之六七年轻人冇兴趣生BB，因谂唔通生嚟为乜？四、移民潮不断，你知我知身边仍有大量中产“蠢蠢欲动”，只差几时动身；五、周街吉舖，日日执笠多过开张，蚀本生意当然冇人做；六、过去几年买咗楼的，全部坐艇，有的挞订，有的死顶，不知会否最终投降；七、息率高企，买乜楼都好，要供就好恶顶；八、工商业单位越来越多空置；九、大量新落成住宅单位变“库存”，发展商头都痕，唔知点散货以令资金回笼；十、以前发展商不时强调自己的“土地储备”（Land Bank）越大越好，见地即投，如今反而谂点甩手。
　　
小弟随口噏都讲出十个重点，政府高官收几十万元月薪，大权在握，会否唔知？当然唔会。咁就出现上周发展局局长宁汉豪突然高调声明：市场冇胃口，今季停卖住宅地。
　　
政府绝对不应亦不可贱卖官地，故这只是做对第一步，下一步，若要救市，就应以开展心理战，话畀全世界知，土地不会“无限量供应”。任何商品一旦求过于供，价值必插水。所以，应立即喝停个“明日大屿”计划，先打场“土地有限㗎”的心理战。