【曾智华专栏】“坚又威”需唞长一点

N年前牙擦练马师简炳墀有句名言：“马系要嚟跑嘅！跑得就跑！”
　　
事实佢经常安排旗下马不停跑，跑跑吓突然会W一次。点解？留畀大家想像。
　　
小弟哎吔做过吓马主，当然知道马主心态，最好旗下马不停出赛，次次落沙圈过吓瘾。若只马好日都唔出赛的话，又冇得玩，又冇得威，个个月斋比几万元养马费，好冇瘾啫。
　　
不过做完马主之后，就了解马不同人，千几磅重压落四只瘦瘦的脚，再嘭嘭声跑，其实好恶顶。故此，一定要锡住，由兽医及练马师睇紧，按健康情况容许才出赛。
　　
一般马博完一场激烈叮当马头赛事，必须畀佢休息耐一点，好等体力复原，才再上阵。这个“唞”可以是三几个月。
　　
今日想讲圣若瑟同学仔只“坚又威”，摆明好马，但去年11月底一场千四米二班赛事中，与五岁马“飞鹰翱翔”斗到甩髀才分胜负，摆明消耗太多精力，不宜短期再出。
　　
果然后者不足一个月匆匆跑两次，第二仗结果输足三个马位，走晒样，用得太尽，有机会重挫其斗心。
　　
“坚又威”又如何？虽则休息个多月，但中间曾缺课，十档热到得两倍，我当然唔买，但也佩服“踊跃捐输”人士。结果，惨，走晒样，输两个多马位，第六名过终点。是否对上一场直路炼得太尽伤元气？可能系，总之今次畀佢唞耐一点较好，四岁马可以有排玩㗎！
　　
明天最有趣为三级赛跑一千米，三只最劲的皆为骑师私家马，一为潘顿的“四季醒”，另一为布文的“英雄豪杰”，还有两人曾W的“贤者无敌”。如今两大师傅三只都唔骑，咁我就要研究边只黄袍加身嘞！
　　
少少哋买“聚才”及“状元及第”WP对碰啦！