独家丨KC高票封最佳男友 亨仔超抢口疯狂得罪人 《造星V》5子冲绳首拍综艺互爆私密事

5位《造星V》囝囝黄家灏（KC）、陈镇亨（亨仔）、王希晋、田曜诚（Tsoul）和卓金乐（Kim），签约Viu后首项任务是拍综艺节目《冲绳任你点》。朝夕相对12日，5子笑言睇清大家真面目，唔介意互爆私密事，KC更高票数当选最佳男朋友。另外，他们预告将以不同团队出道，新歌已制作中。采访：廖思慧、杜杜 摄影：Stanley服装: Rickyy Wong、Pedro(KC)；AMBUSH from Farfetch、Tommy Hilfiger(亨仔)；Mostly Heard Rarely Seen from Farfetch、Rickyy Wong、Pedro(希晋)；Crenshaw Skate Club and AMBUSH from Farfetch、Pedro(Tsoul)；Heliot Emil and AMBUSH from Farfetch、Rickyy Wong、Pedro(Kim)

Tsoul、KC、希晋、Kim和亨仔希望下次原班人马拍港版《不准笑》或跟“无制限”团队去大冒险，讲明唔怕玩蹦极跳。

黄家灏（KC）

陈镇亨（亨仔）

王希晋

田曜诚（Tsoul）

卓金乐（Kim）

 5子在节目中要考执生能力，亦有不少挑战，希晋和 Kim因不熟水性超惊。童年玩水上滑梯浸亲的希晋说：“着救生衣玩香蕉船要飞落海好惊，后尾发现唔系咁惊，落咗水闭一闭气就浮返上嚟。”Kim玩喷射飞行亦吓亲，“我系第一次玩亦都系第一个玩，都唔知点玩，叫我反转就反转囉！”亨仔赞自己玩得叻，“我撑到10几秒，最劲，大家估唔到我系最犀利𠮶个，虽然我最肥。”而KC最大挑战是晒后皮肤敏感，算是工伤，Tsoul亦估唔到咁夸张，更以关公形容，KC称手脚还好，但面最严重，就算戴帽同眼镜都搞唔掂，更试过拍完坐低流鼻血，原来燥得滞，“成个节目冇乜点化妆，日照太劲，块面皮肤敏感会肿，个人胀咗咁。”

对于要扮卡通人物，5子觉得好过瘾，完全唔尴尬。

打Golf当日超好天，难怪KC会晒到皮肤敏感。

希晋被狂窒成箭靶

参加《造星V》相处时间长，但冇一齐生活过，5子称在冲绳同居12日急速了解。要他们互爆秘闻，希晋惨成箭靶，KC先出手，“佢污糟，着住对鞋喺房周围走。”亨仔再补刀，“佢个脑function唔到同时做两样嘢，叫佢左右手各拎啲嘢，会成个企喺度！所以成日唔见电话银包。”KC补充，“佢又差啲唔见身份证。”希晋澄清：“唔系唔见，唔记得咗啫！”睇住5子自相残杀好好笑，称他们跟《造星V》时感觉唔同哂，亨仔承认：“𠮶时讲嘢好客气。”Tsoul即窒亨仔：“你𠮶时讲嘢都唔系咁。”揾到位入的希晋即出声：“系囉！𠵱家成日窒住晒，成个行程亨仔系咁窒我。”亨仔反驳：“唔窒你窒边个啫！”大家异口同声笑指得希晋反抗唔到。

Tsoul行开型格路线，对于扮蒙罗丽莎，笑称碎料。

在猫岛之称的奥武岛拍摄，5子一样要扮鬼扮马。

亨仔唔认衰狂辩驳

见亨仔咁得戚，Kim忍唔住爆料，“大家啲鼻鼾太嘈，我搬出厅瞓，拍完返嚟污糟，佢就一嘢挞落梳化瞓。”亨仔超抢口：“咁梳化系攞嚟瞓㗎啦！”Kim嬲爆：“我攞嚟瞓嘛大佬！”希晋乘机踩多脚：“仲坐落佢个枕头！哈哈！”亨仔越讲越衰：“除晒衫裤㗎我！”大家即起哄：“仲衰！”记者主持公道：“你个身有汗！”亨仔终认衰，“咁都系嘅，咁讲返声唔好意思囉！”另外，KC亦爆Kim乌龙事，将亨仔内裤误放入他的箧，亨仔抢攻：“咁大条点会系KC呀！”KC即反抗：“咩呀！应该再大条先系我嘅，哈哈！”

5子一身《超级战队》系列造型，可能件衫超贴身为怕尴尬要外加短裤。

5子到当地艺人学校交流，寓工作于学习。

KC鼻鼾超劲被嫌弃

获赞好企理的KC亦有缺点，亨仔说：“唔好见KC咁靓仔，佢鼻鼾系最劲𠮶个，黐线㗎！我有晚要戴AirPods Max瞓，顶唔顺，佢同Kim交响乐咁，真系发脾气。”虽然有不满，但若要介绍男仔畀妹妹，亨仔依然投KC一票，“心地好系紧要，温柔又善良，佢又咁锡女朋友，有办喺度。”希晋及Kim冇异议，而Tsoul就投亨仔，“佢咁好笑，同佢一齐应该好开心，做伴侣过世，梗系要揾个𠱁到你80岁都笑。”而获封最佳男友的KC笑言：“我唔会让我个妹畀你哋班躝瘫，哈哈！希晋啦！呃晒佢啲钱。”希晋弱弱反驳，“哗！咁贪财！”

Tsoul和希晋学空手道，个样好认真㖞！

希晋、Kim和亨仔学习冲绳传统乐器三线。

讲到Taco签约Sony新厂牌Green Music，成为首个签唱片公司的《造星V》囝囝，问到五子会否羡慕？希晋先问工作人员再公布喜讯，“我哋下年（2024年）会出歌，期待吓，在坐都有份。”据知5子是以不同团队形式出歌，由公司主理。

扎染亦是冲绳的传统技术，5子亦有亲身体验。

《星岛头条》新网站有更多精彩内容：http://www.stheadline.com/