独家丨曾若华含泪剖白离巢华纳：10年来不断被拒绝出碟 做兼职婚纱摄影师赚钱继续出歌
31岁曾若华（JUDE）10月在ig宣布跟华纳唱片结束10年合作关系，她接受《头条日报》独家访问剖白离开原因，跟“空头支票”有关。虽然浪费了10年，但JUDE冇担心，做兼职婚纱摄影师支持自己的独立歌手梦，提到妈咪唔赞成，劝“止蚀离场”，她一度讲到眼湿湿，强调想畀多一次机会自己先甘心。采访：杜杜 摄影：朱伟彦 首饰:Maazi Jewellery
10年前签约时，JUDE只有21岁，以为人生一帆风顺，到6、7年后觉得自己越嚟越沉，“女仔年纪越嚟越大，就会谂应唔应继续呢？！但我好钟意音乐，好多目标都未达成，如出碟、开个人Show。”对于发展，JUDE坦言完全唔满意，“真系好唔开心，出歌系好基本，但系我就要过好多level，有好多制止，（公司）可能话迟啲先，另一个artist出先啦。”她曾向公司反映，最终都冇下文。
想退居幕后唔甘心
2020年1月，JUDE推出歌曲《零分》，成绩不俗，更成为她首支两台冠军歌，可惜遇着疫情，完全零演出机会，虽然公司有乘势为她推出《十分错》及《醒》，可惜并非她所期望，“可能冇乜时间去谂点做宣传，又唔系做紧我想做嘅嘢，因为方向都系佢哋决定，呢个系最大困扰，作为音乐人其实都想出自己嘅歌。”今年8月，有传卫兰和卫诗不满华纳将大量资源投放在张天赋及洪嘉豪身上，因而结束8年合作关系。JUDE坦言唔觉资源分配不均，但承认公司安排令她心灰，“公司想我行某个路线，虽然唔系我想做，但都会尝试，但系见到啲新artist，佢哋做紧我想做嘅嘢，如唱英文歌，咁OK，我自己出嚟尝试囉！”
JUDE的强项是作歌及拍MV，曾想过放弃幕前工作，但始终想完成心愿，“好多网友都讲‘JUDE你不如做幕后，你中文又唔系太好，唱歌又唔系好劲’，我收到好多呢啲意见，有吸收同消化，其实认同嘅，但我又真系好想唱到自己写嘅歌，真系我嘅梦想，𠵱家有机会跳出嚟，所有嘢都系我决定，连cover用咩字都系我决定，我畀最后一个机会自己，去表达自己想讲嘅嘢，起码试多一次。”
向Tyson Yoshi取经
决心向独立歌手发展的JUDE，之前有向Tyson Yoshi及王嘉仪取经，“会问啲好技术性嘅问题，如点开公司。”她承认资金是最大难题，唯有靠副业帮补，“呢3年都有一个副业，就系婚照摄影，非常钟意做，我之前系读摄影，唔想嘥咗呢样技能，同埋𠵱家所有嘢都系自资，真系好需要金钱，当系投资落自己身上。”她已计划推出英文歌《Agree and Disagree》，暂时已花了5位数，“我谂做唔到6位数，我仲要生存，哈哈！”
JUDE坦言家人一直很担心她在娱乐圈发展，提起妈咪她更讲到眼湿湿，“妈咪嘅角度，会觉得个女花咗咁多时间同青春，系咪应该快啲结婚呢？！系咪应该快啲稳定落嚟？！冇一个妈咪肯畀个女继续追梦，虽然佢唔系金钱上资助我，但我住佢间屋，都系一个开支，好感恩佢哋嘅支持，我畀紧最后一个机会自己，承认系一个几自私嘅决定，都希望做到我想做嘅嘢，一切畀个天去决定。”圈外男友好支持她发展音乐事业，暂未有结婚计划，“我要搏杀做音乐，未必可以兼顾到屋企。”放手一搏的JUDE，讲明不会再花10年青春在幕前发展，但一定会继续做同音乐有关工作。
《星岛头条》新网站有更多精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
