【曾智华专栏】生坏命，改坏名

俗语有云：“唔怕生坏命，最怕改坏名。”
　　
现役马中不少马主相当有修养及有学识，能在马匹命名中反映出来。
　　
上赛本栏提供贴士，直路赛一拖三，以大热马“贤者无敌”行头，拖“当家精神”、“精灵勇士”及“状元及第”。结果幸运地命中Q，热热哋派七十九元，有倍多利润，唔错㗎喇。
　　
“贤者无敌”寓意好，够正气，令人听得舒服，贺贤练马师赛马团体中有改名高人。此马真犀利，今季出三场全胜，仍远未见底，再出也要捧场。至今出六场已赢超过七百万元奖金，跑直路一千米暂仍无敌！同场曾经是一千米明星的“实现梦想”，上季三出三胜，今季四出四冇影，唔知坏咗边瓣！
　　
讲返马匹改名，年多前有位马会高层大P拉我讲：“碌Sir，呢匹马大镬，改坏名！”
　　
“边匹？点坏法呀老友？”
　　
“正是‘喜报围家’也，真系不伦不类，身边班抵死友个个哈哈笑，替佢改咗名做‘起步为艰’，感觉相当不利。马匹名字可以好邪，唔知点解会影响马匹命运。例如政治马名、低俗马名及不利谐音马名，皆⋯⋯以前有匹‘钉囉’，你可记得？由英文Danelaw直译，结果真系⋯⋯”
　　
大P讲时，为去年年底，“喜报围家”刚出赛。至今跑咗十六场，不但冇W冇Q，且场场追都唔追，上周又输七个几马位，跑第十。试过由八位骑师出策都食白果，问你服未？
　　
今晚我再研究当红炸子鸡伍鹏志部署，上赛佢又三W，你边有得唔服。
　　
第七、第八两场千二米，佢皆用巴度，因做到轻磅。“添开心”今季出三次，两W一第四，极准，排四档，做胆！另一只“闯一”，排九档，应半冷，今季出三次两第四，蹄声渐近，上季的一W，也是由巴度经手，大家存记！