头条戏场丨《断网假期》现代人真系好废

由Julia Roberts、Ethan Hawke及Mahershala Ali合演的末日惊栗片《断网假期》，12月8日于Netflix上架即登上英语电影收视榜首，有奥斯卡影后加男配孭飞，加上《黑客军团》首脑Sam Esmail自编自导，受欢迎都好正常，不过，Netflix最钟意揾巨星拍烂片，中伏过无数咁多次，睇观众评论证明冇估错，“烂番茄”好感度由刚上架的75%急跌至截稿前的34%，反正最钟意挑战烂片，片长141分钟，抱住顶唔顺就熄机心态，竟然唔觉意睇晒，悬疑点有新意，又有大量反思位，结局有幸福感，其实唔差，可以短啲更好，真心几好睇㖞。(已上架) 图片提供: NETFLIX  撰文:廖思慧  
 

两家人都系知识份子，但面对断网断通信完全无能为力。

屋主深夜拍门，系咪一定有古怪?

两家人未知事态严重，仲有闲情饮酒吹水。

有知识的中产夫妇Clay（Ethan Hawke饰）及Amanda（Julia Roberts饰）带仔女到长岛度假，到埗冇耐已有怪事发生，先在海滩遇上邮轮搁浅，个心仲惊紧之余，返高级民宿后又发现冇晒网络，电话打唔通连电视都睇唔到，大人自我安慰觉得暂时性，细女Rose (Farrah Mackenzie饰)最唔开心，因为佢系经典美剧《老友记》Fans，争结局未睇周身唔聚财，虽未至于如《家有喜事》的琴姐，冇电视睇会大叫，但不断追住叫老窦“整好个网络。”，煲开剧的人代入感必定好强，如我。

G. H.租畀Clay一家的高级民宿，系正嘅。

中产夫妇的一对仔女，阿哥好怪，阿妹更怪。

因为上唔到网，阿妹睇唔到《老友记》结局。

阿妹一早觉得邮轮唔妥，观察力相当强。

因为架车冇导航，Clay争啲返唔到民宿，同时发现Tesla玩揽炒。

民宿主人房幅墙画原本风平浪静。

自断网后，墙画跟据男女主角心情变成惊涛骇浪。

断网后不时传出刺耳噪音，可震裂玻璃。

话咁易制造全民恐慌
然后声称民宿屋主G. H.(Mahershala Ali饰)及女儿Ruth (Myha'la饰)突然深夜拍门，表示纽约停电未能返归想在民宿借宿一宵。两个家庭、三个大人及三个细路身处断网环境，周围冇晒人，以为有杀人狂或外星生物偷袭?系冇嘅，又以为有成堆陨石袭地球?都系冇嘅，电影有别一般末日片，灾难来自主角面对未知嘅零反抗能力，通信及网络突然切断，人与人之间互相猜疑，再陷入内斗，现代人其实好脆弱，即系废。

G. H.出外揾邻居，见到飞机冲落海。

阿妹一早见到鹿群离开，但父母冇理佢。

因为导演在电影中提出问题但最后冇解答，开放式结局惹来观众海啸式粗口问候，念力可大可小，愿导演安好。电影悬疑感来自未知的恐惧，最怕睇悬疑片见到蠢人做蠢事，庆幸呢套冇，全片最细的Rose最挑通眼眉，一早发现鹿群发出危险警号，结局跟住妹妹会心微笑，I Know That Feel 。

电影在12月8日于Netflix上架即登上英语电影收视榜首

《星岛头条》新网站有更多精彩内容：http://www.stheadline.com/