【曾智华专栏】退休高官忌入商界

年尾年头，特多饭局聚会，有的旧同学，有的旧同事，有的同业老友，也有的是同声同气同信念同价值观的江湖友好。
　　
饭局中，除互相问候报报近况，晒吓去过边度旅游食好嘢之外，当然提及边个“走咗”（外地或天堂），然后少不免欷歔一番。
　　
退休多年的公务员老友，全由港英时代亲身体验回归后的一切，百般感受。讲起昔日，个个口噏噏《每当变幻时》——“怀缅过去常陶醉，一半乐事，一半令人流泪，梦如人生永记取，悲苦深刻藏骨髓⋯⋯”
　　
小弟性格与大部分人有少少不同，只喜欢唱罗文的《家变》——“知否世事常变，变幻才是永恒，始终波浪起跌，当然有幸有不幸⋯⋯”，以及《狮子山下》——“人生中有欢喜，难免亦常有泪，我哋大家在狮子山下相遇上，总算是欢笑多于欷歔。”（视乎不同年龄！）
　　
前晚与退休高官老友相聚，有的移民回流，有的回港度假，有的日日“享受人生”（即无所事事），有的忙于慈善义工，有的再战江湖，其中一位阿B闯入商界，打大财团工，身光颈靓，但灌两杯后满肚苦水。
　　
“喂，成千万元年薪㖞B佬，扮痛苦？”在座有人玩吓佢。
　　
“唉⋯⋯入咗商界才知，大富豪真系冇死错人！之前交往，必恭必敬，乜处长前、物局长后，但一变上司，狰狞面目即浮现，冇面畀！之外，做公务员一切有规有矩，但商界唔知乜叫规矩，总之唔犯法就做，经常踩线。老老实实，我顶唔顺喇，决定年尾走人，以免唔觉意中正刑事，长俸都冇埋！”
　　
“大家几十岁人，点可唔知大老板畀千万元年薪你，原因纯希望利用你之前政府关系，赚返起码一亿元，你估同你有亲咩！”我细细声窒佢几句。