独家丨80岁仙杜拉被甄妮爆跌亲后首开腔报平安 兴奋晒情史激赞谢贤正人君子

“乐坛风纪”甄妮近日大爆移居加拿大30年，80岁“鬼马歌后”仙杜拉(Sandra)跌亲，兼伤势唔轻！《星岛头条》千辛万苦揾到当事人回应，Sandra以一贯鬼马语气报平安，声大大之余仲识得笑：“我就嚟好返㗎喇，多谢大家关心。”最后她不忘带笑提醒大家：“唔好唔记得笑！”因为笑能医百病，Sandra笑言脑里只有美好回忆，包括曾被谢贤力追的乐事。采访：方骞平 摄影：邓国良

Sandra月前在酒店接受《星岛头条》访问时行得唔算太好，但仍然精灵。

访问期间，Sandra玩饮管吹出BB声，好可爱。

Sandra坚持做人要开心。

Sandra健康算系咁。

唔似80岁老人家。

可爱大细路。

早前仙杜拉曾返港为《情牵煇黄经典演唱会》演出，老人家虽然步速较缓慢，但依然活力十足，劲精灵，唱起歌来宝刀未老。经理人MiMi透露，Sandra跌亲只系小意外：“4周前，Sandra左脚跘右脚失平衡跌亲，幸好有地毡垫住唔算太伤，只系肩胛位裂咗，侧身瘀黑咗，送院后医生话如能自动埋口，不用做手术，约6个月内康复，叮嘱最好做啲运动，加速复元。”MiMi补充Sandra目前每月覆诊一次，已好得七七八八，“只系伤患仍隐隐作痛，但佢有时曳唔肯做，要逼吓𠱁吓。”

3个月前，仙杜拉曾返港为《情牵煇黄经典演唱会》演出。

仙杜拉留港期间跟方俊一齐到老人院探望张伟文。

嗲甄妮惹误会

对于甄妮指Sandra传来柔弱声音令人担忧，还叮嘱住Vancouver嘅同行送上关心！MiMi即叫大家唔使担心：“佢对甄妮系嗲啲嘅，老友嘛，而且佢仲系鬼马小朋友，会同甄妮讲：‘我好惨呀！’而且通话时可能开始眼瞓变得模模糊糊，声音柔弱咗，所以惹来误会。其实除家佣外，仲有同屋住雷太会互相照顾，而我及好友Nelson经常过去。”Sandra亦语带轻松亲报平安：“多谢大家关心呀，系只拖鞋曳曳呀，搞到我唔觉意跣倒跌亲，𠵱家由医生跟进紧，进展非常好，我就嚟好返㗎喇。多谢晒，唔好唔记得笑，哈哈！”

经理人MiMi(左起)、同屋住Clara、好友Nelson会照顾Sandra。

甄妮近日大爆Sandra跌亲，仲话伤势唔轻！

畀记者睇胸口
另外，Sandra在港时曾接受《星岛头条》访问，强调现阶段只想健康、冇烦恼，所以从来唔会睇负面新闻：“人与人之间为乜要互相憎恨？唔好打交，唔要打仗，感恩我会好快掉走烦恼，唔好嘥我时间谂。”2020年，Sandra证实左乳生cancer，当时她以乐观心情面对：“医生问我割咗后使唔使做义乳？我秒回‘割埋另一边免除后患！’所以我经常用国语同人讲‘我没有空(胸)’。”Sandra更笑言，“瞓觉冇嘢压住晒，手术后马上掉晒胸围，好记得汪明荃跟我讲‘唔紧要啦，寿包一个，有冇都睇唔到！’哈…佢好好玩，好锡我。”语毕Sandra搞笑地对本报记者说：“你要唔要睇吓我个胸口？好似眼眉咁。”更忍不住唱两句“我一见你就笑…”相当自得其乐。癌病康复者的Sandra并冇三高，她坚持会唱到健康撑唔住，暂无意退休。

仙杜拉及雷安娜都系居于加拿大嘅朋友。

于加拿大生活美满。

曾为剧集《啼笑姻缘》女主角李司棋做幕后代唱。

《啼笑姻缘》女主角李司棋

60年代，仙杜拉与阿美娜组成“筷子姊妹花”。

《风云》一曲唱到街头巷尾。

Sandra 曾客串TVB长篇短剧《季节》饰周珮青母。

曾被“大粒佬”追

Sandra的过滤式记忆只会记取快乐事，她自豪地爆料：“我16岁开始已经有好多人追，直至𠵱家都有唔止一个老外追求者呀，哼！你估我冇呀，我哋喺街上相识，有个经常打嚟约我，但推佢两次，对方应该放弃咗，我唔想自找麻烦，只想和平。”她自爆年轻时追佢嘅唔系医生、律师，就系有钱嘅“大粒佬”：“佢哋唔想我抛头露面，要求包养我，当中有个澳门已婚名人，但我唔想害到人及受害，我好爱锡生命。”Sandra直言男人追求女星，目标都系为上床，呢方面佢好清晰：“我好直有𠮶句讲𠮶句，你估上咗床仲会要你咩？睬你都傻啦。”不过，她激赞追求者中以四哥(谢贤)最有风度：“虽然佢喺行动上曾暗示过(发生超友谊关系)，但被我拒绝后仍继续追求，佢系正人君子，我好尊敬佢。”

年轻时嘅Sandra样貌鬼鬼哋，好多人追。

四哥跟萧芳芳系男美女。

Sandra曾被四哥力追，赞佢系正人君子。