【曾智华专栏】鸡汤大战益用家

老老实实，小弟经常会变“婆仔”（绝无贬意！），即四周围格价。尤其每逢星期五，必定将《星岛日报》逐版揭，睇睇各大超市集团有乜平嘢。
　　
我最留意三种商品：一、红白酒；二、梳打水及汽水；三、鸡汤。
　　
点解连鸡汤都咁着紧？皆因多年前已开始拒绝用“毒药”（充满化学调味品的方便面汤包）煮面，因一啖入口已喉头火烧，兼且唔使专家讲都知，呢种邪妖味甚重的化学汤，有害健康也，事实也绝不好味。
　　
故此，花费多一点都要，就是改用盒装的清鸡汤。一半汤，一半清水，已非常好味，绝不会令人口渴，饮得放心舒服。
　　
事实不少高级食肆近年已戒用味精，因嘴尖客人一啖入口就知。至于改用鸡粉，效果也不是最好。不过，若自己煨上汤，则极花时间与金钱，故此，最佳方法用清鸡汤。
　　
鸡汤市场增长速度非常惊人，一直以来都是史云生弹离领先，亨氏第二。早年超市集团见需求咁劲，自己又出。
　　
但咁搞法，一方面与批发及出品商直接利益冲突，另方面，你唔系专家，点够人斗？
　　
我试过买超市自家出品，差得多，一啖入口已掉得，咪搞，平三两蚊根本完全冇竞争力。
　　
上周五早上揭报，哗，犀利，有只超劲牌子开始杀入鸡汤市场，正是本来强项属出鸡粉与鸡精的家乐牌。
　　
其实我一直唔明，点解佢哋作为“鸡味”霸主，冇早早挥军落场竞争，结果畀位史云生独霸天下？
　　
如今一系唔出手，一出手就全版广告，斗平，平到三十五点四三元三公升（一般要四十二元九角至五十一元，上个旧历年底更曾去到五十七元）。
　　
哗哗，有竞争，有进步（喷血劈价），此时我当然大力扫货，以免“苏州过后”呀。