【曾智华专栏】抢钱呀！

资深马迷一定试过被“抢钱”经验，即系点？
　　
即系明明睇中一只大冷或半冷马，当然买WP啦，最开心系只马行圈时赔率冇郁，心谂：“哗哗，若果跑出就得米矣。”
　　
通常马迷会在入闸前落注。经常发现入闸时的赔率，竟与出闸时不一样，即冇咗一大截！意即有幕后人在入紧闸时才郁手，提防畀人跟到，以免分少几蚊或几十蚊。
　　
上周日赛事，本栏贴第八场三只马——“怡心声”，“闪电烈马”及“攻顶”。闸前赔率分别为十一倍、七倍及十二倍。我每只买十蚊W，共三十蚊，只只有得分，跑出边只都赢。
　　
结果“攻顶”W出。哗！有成十二倍噃，仲唔肥过肥猪仔？点知⋯⋯喂喂，抢钱呀！因过终点后，电算机打出得八倍，即冇咗三分一，真真顶佢个头球，摆明又有“先知”临出闸才大手落注！
　　
唉！都好啦，希望大家都似小弟咁，投注三十蚊，收返八十五蚊，有五十五蚊利润，算和味㗎喇。
　　
好！向前望！
　　
全个马季高潮今晚展开，首先是“国际骑师邀请赛”。十二位参赛者，虽曰位位精英，但仍有卡士之分。香港代表除潘顿外，差半班。
　　
我会点买？场场买骑师！一于五串十复式二重彩，选以下几位：一、莫雅，毫无争议的当今天下第一高手，全球马场及所有路程皆难唔到佢，骑任何马都跑高半班至一班；二、麦道朗，唔使多介绍，你睇佢点赢“浪漫勇士”已拍案叫绝；三、马昆，上届冠军，当今欧洲冒起最快的明星，只二十五岁，大把前途；四、杜苑欣，马昆太太，甜姐儿，阵上斗志惊人，乃英国一季内胜出最多头马的女骑师（2021年，一百七十二场）；五、潘顿，肯定今晚会出“硬鞭”嘞，若仍有自尊心及英雄感，点会衰比全球同业睇？