【曾智华专栏】畀贴士者的矛盾

周三晚第六场跑完，手机立即跳出信息，来自老友“抵死B”：“碌Sir，犀利㖞，贴只三十八倍马‘龙的风采’，唔太差吖，跑第八，输五个马位啫，哈哈哈，好准㗎喇！”
　　
点回应呢丁死仔？难道辩驳咁戆居？只好回以一个无奈的Emoji。
　　
每逢赛马日，本报马经版几十个专栏，个个作者都提供贴士，有几多会命中？你自己Check吓就知，佢哋个个都想中，但结果呢？
　　
畀贴士乃一个极大矛盾，畀热门马，“抵死B”呢类多口佬一定揶揄：“唓，擦鞋仔贴士，使鬼你畀咩？叫乜做马评人啊？收档啦！”
　　
边个唔想提供冷门而爆出？但十次都冇一次会中，“盲公陈”都唔掂啦，博被拆招牌咩？所以，畀贴士与睇贴士，千祈咪认真，赛马只是一场游戏一场梦，以为自己好劲者死！
　　
例如上周日在沙田威爆玻璃的两位骑师潘顿及艾道拿，相隔几日立即由马场龙变马场虫。
　　
潘顿重新攞返条“软鞭”出嚟，全晚游马河，竞赛小组有冇抽秤？冇！吹佢唔胀，掹佢唔长，全晚一只位置都冇，咬佢乎？
　　
另一位艾道拿，也开始进入“香港赛事角色”，上周日做咗“骑师王”之后，立即缩，一只W、一条Q都冇，难度好高㗎老友，但香港赛马就是如此！
　　
明天最令人兴奋，为全球顶尖高手麦道朗空降，任何真正马迷，必仍在回味佢如何在千分一秒之下赢出“浪漫勇士”，真真拍烂手掌。
　　
今次短期客串，一众练马师为打好关系，纷纷提供有机会马佢杀，尤其沈、东、蔡及姚四厩，要𥄫实。
　　
我投注以下四只，沈厩的“旺旺神驹”、东厩的“同样美丽”、姚厩的“魅影猎飞”及蔡厩的“气势”，全部热门，但重点不在赢钱，而在睇表演，四十蚊买！