独家丨蔡继光导演爆陈百强曾因洁癖拒拍 揭43年前拍摄《喝采》秘闻

陈百强（Danny）、张国荣（Leslie）、钟保罗和翁静晶主演的青春片《喝采》，相隔43年，最近以4K数码修复版再度公映，导演蔡继光接受《头条日报》专访时，大谈当年拍摄点滴。蔡导指 Danny因为唔愿拍玩爽身粉戏份而拒绝开工，而翁静晶则凭住西洋气质挥低周秀兰成为女主角。采访：杜杜

蔡导有10多年冇睇过《喝采》，重看百感交杂。

蔡导跟翁静晶多年冇见，难得在首映礼聚旧。

戏中有场讲述Danny仔18岁生日，卢业媚等同学送上爽身粉作礼物，最后更玩互洒，虽然戏份简单，但Danny唔肯拍，“因为佢有洁癖，话咁污糟唔拍，佢试过喺艺术中心拍追的士戏，都唔肯去𠮶度嘅厕所，要返伊利莎伯大厦嘅屋企先肯去。”由于当时电影开拍无耐，蔡导怕往后失控，一度要胁Danny唔拍就换角，“年青演员都系睇佢头，佢作反咁点搞，我咪话‘你唔拍就走，但唔好再返嚟，我再揾人拍’。”Danny即打电话向当时经理人谭国基求救，“谭国基叫佢‘你千祈唔好走，快啲返去拍戏啦’。”蔡导赞Danny专业，有不满但埋位睇唔出，“佢返嚟拍，拍得好开心好投入。”

有洁癖的Danny唔愿去艺术中心的厕所。

戏中卢业媚等同学跟Danny大玩爽身粉战。

蔡导最难忘结尾歌唱比赛戏份，除有临时演员饰演观众，还有大量Danny粉丝。

翁静晶挥低周秀兰做主角

谈到女主角拣了当时只有15岁的翁静晶，蔡导称当年陈欣健带了两个女孩跟他见面选角，“一个系翁静晶，另一个就系周秀兰，拣翁静晶系因为感觉西化啲，同套戏个气氛比较夹，亦都衬Danny，同埋佢开放啲，可以尝试唔同嘅嘢，周秀兰系传统香港乖女仔嘅形象，唔系太啱呢套戏。”当年翁静晶虽然年纪轻，但在蔡导眼中一点也不似15岁，“可能佢家庭背景，好少见爸爸，妈妈又好恶，平时得佢同细佬，佢系好独立好成熟。”而蔡导之后执导张国荣主演的《柠檬可乐》，最终选了周秀兰任女主角，“想佢同Leslie有个对比，Leslie好西化，佢就传统啲。”

翁静晶当年凭住靓样同西洋味，成功取得女主角位置。

蔡导觉得Leslie被工人凑大有份孤独感，最啱演比较cool的“Gigo”。

戏中钟保罗跟黄嘉宝有大胆床戏，蔡导指他零偶包演出。

《星岛头条》新网站有更多精彩内容：http://www.stheadline.com/