独家丨宝珮如爆《白日》精彩删剪剧情同“院长”有路 无奈被Cut戏难忘喊住献身
获金马奖5项提名的《白日之下》上映两周票房收近500万，观众大赞戏中所有演员演技出色，包括59岁饰演恶毒看护的宝珮如（Baby）。她接受《头条日报》专访时首公开删剪剧情，她饰演的“芳姐”原来跟林保怡演的“章院长”有段情，做事麻木不仁全为院长，被删戏份相当精彩，Baby言谈间好无奈但明白导演用意。同时又开心提到，买生果遇到《白日》粉，仲用佢嘅戏中对白回应返佢，𠱁得Baby好开心。采访：杜杜 摄影：罗安强 场地:Studio Meta
因母亲患有认知障碍症，Baby因工作关系要安排妈妈住护老院，所以好了解看护工作情况，“系好烦厌嘅工作，点解要绑住老人家？方便佢哋做嘢快啲，我妈妈都被绑过，因为佢周围走惊走失。”当《白日》监制尔冬升亲自揾她演“芳姐”时，她睇剧本已觉得角色好有发挥，更惊爆同保怡的非一般关系，“做衰人，但内心唔系咁差，系为咗爱，呢个看护同保怡有段情，其实我系为佢。”
开心对白观众入晒脑
原来“芳姐”麻木不仁，全为了院长“章剑华”，在删剪戏份中，Baby跟饰演看护“何姑娘”的龚慈恩有场对手戏，“龚姐叫我‘你唔好再为呢个男人做嘢啦’，我同佢讲‘我唔需要呢个男人为我报恩，我系甘心情愿为佢’。”Baby跟保怡的感情戏被完全删剪，当中最令Baby难忘的场口，是跟保怡的爆喊献身戏，“我想佢开心，献身畀佢发泄，佢推开我赶我走。”被拒后的“芳姐”喊住质问 “院长”，为何要“小铃”（智障院友）都不要她，“我话‘我为你做咗咁多嘢，由边度开始跟到你嚟呢间安老院’，𠮶段戏我好钟意，一路喊住讲。”
喜爱戏份被删剪，Baby好无奈，但亦理解导演用意，“人生就系好矛盾，我有谂返呢段戏，如果有埋大家会觉得我未必咁衰，唔会focus喺射水、打人𠮶啲情景，cut咗就会focus返，全套戏喺安老院发生，唔要有支线，净系见到个恶姑娘、衰嘅姑娘。”虽然戏份不多，Baby演出仍获激赞，上映3日去买生果已有惊喜，“我拣紧车厘子，问后生老板，盒底𠮶啲唔知靓唔靓？佢就望住我话‘一系食一系唔食’，佢讲句对白因为认到我，几得意佢入咗脑，原来佢同几个sales都睇咗，话‘你做得好正呀！宝小姐’，呢个系第一个亲自收到嘅反应。”
向林保怡搲捞再合作
除了获赞，能跟欣赏已久的林保怡首合作，亦令Baby好享受，“对戏时佢攞咗我个剧本掉开，佢话‘唔好睇，唔好限住𠮶样嘢’我即刻窒一窒，以为佢好恶，对完戏佢话‘我哋猜枚，你饮唔饮酒㗎？玩吓囉’佢谂到我紧张，想我放松，我真系同佢猜枚，好听话，融合咗‘芳姐’对佢嘅爱，佢要乜我提供乜，佢帮到我。”由于合作太过愉快，Baby更鲜有主动搲捞，“我知佢有做导演、监制、写剧本，我自荐话‘好想再同你拍，你有咩啱一定要揾我’”
访问当日是11月11日，正值Baby发生严重车祸24周年，“以前我好骄傲，因为太细个好容易得到一啲嘢，入行有个好好嘅经理人周梁淑怡，冇读过训练班就做主角，同好多大星做节目，冇做过路人甲乙丙，完全冇挨过，就系一个车祸，所有嘢停晒、冇晒，反思以前有嘢食都话唔食要减肥，𠮶时真系好衰格，所以我冇撞车，可能停留喺𠮶个阶段。”Baby认为现在的出色演技，全靠这些经历提供养份，“早几日食慰劳宴，见到尔生（尔冬升），谭玉瑛姐姐坐我隔篱，佢问我哋两个，唔系话我哋老，佢问‘系咪上咗年纪，个戏越嚟越好’，我答佢‘唔系戏越嚟越好，系我哋人生经验丰富咗’。”
对于会否继《蓝天白云》后，再有电影奖项提名，Baby完全冇信心，“呢个戏个个都咁好，佢哋实至名归，我仲未行到𠮶步，已经好感恩做咁恶死嘅看护，被人认同我做到恶女人，已经攞咗奖啦！”明年便登六的Baby，不但不言休，还希望继续有进步，“好想演‘老鸡’（老妓女）、企街𠮶啲，我未演过，呢啲戏好难演，我又好想演吸毒者，鼻涕口水流𠮶啲，可能人生经验复杂咗，想演啲复杂啲嘅戏。”
《星岛头条》新网站有更多精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
