刘銮雄记者会全程直击！大刘透露将改遗嘱“执行老婆意思” 坦言开记招目的：至少还一个公道畀太太
富商“大刘”刘銮雄今日（10日）较早前突然宣布于下午3时30分在铜锣湾举行记者会，就近日内地网上的文章作出回应，部分文章声称大刘出现“遗嘱风波”，财产分配出现变化，以及涉及当年华人置业投资中国恒大债券后出现亏损后的影响。大刘在记者会中近日多个传闻作出回应，主要内容有关投资恒大亏损、甘比投资失利、遗嘱风波及财产分配等。今次记者会历时一个多小时，大刘依然声如洪钟，狂轰“贱人”各种行为，疑似向前女友吕丽君火力全开。
【相关阅读】：大刘突然宣布今午开记者会！传为澄清遗产分配传闻
16：50 记者会正式结束
16：40 被记者问：“看好那个儿子日后掌管公司？”大刘表示，能者居之，也不便讲。而问他有否看《爱·回家》而叫子女多回家？大刘表示“有看”，但没有叫子女多回家。“是否开完记招后感觉舒畅？”记者再问，大刘表示：“不是，至少还一个公道给太太。我唔系舒服晒，我系还返个公道（畀太太），真系好紧要，呢个先系我最重要，唔系人哋真系以为佢蚀咗200亿，或者依家失势，乜乜物物，完全冇咁嘅事，咁但系你点会咁大段文章讲咁多废话丫。佢做错嘢做得唔啱我都会炳佢，佢做得啱我梗系要支持佢啦。好嘛？咁多位记者朋友。”
【相关阅读】：刘銮雄记者会丨讲完《东张》再讲《爱回家》女演员 首次接触潮语“坏过凯婷”：吓？
记者此时提问：“会否入市香港股票？”大刘表示，个人认为市况一定不会死，有能力可以在这时候可以入市。而大刘又指，现在的愿望是身体健康。
其后现场有记者问到有关许家印事件：“有冇嬲过许生？因佢营运失败牵连被大造新闻？”
大刘则说：“我从来冇嬲佢，我系嬲我自己，因为我老婆同佢家姐讲过不下200次，叫我卖啦卖啦，我话我卖先佢一定X街，快得过佢应该要X街，我要卖都要报㗎嘛，无论股票定债券，系我自己唔听老婆同佢家姐话啫。”
记者再问：“嚟紧会否减持恒大？”他则说：“第一，唔答呢啲问题，第二，你而家问啲咁嘅问题，我都要Wait and see㗎大佬！你而家国家话要救佢，全部包起佢分帐，咁又唔同㖞，但呢啲而家我哋唔知㗎嘛，我唔想讲，因为日日变㗎嘛，你又唔系财经记者，系咪先？好似今日同朋友商量研究下，好笑呀朋友答得好好，有个新闻话李强要亲自平均保险去救碧桂园，大陆朋友作个比喻，三万吨嘅船就嚟沉，你一万吨嘅船想拖佢走，一万吨嘅船有乜资格去救你三万吨嘅船呀？！你明唔明我意思先？当然系咪我哋唔知啦，但系定唔系迟早会见真章。”
记者再问：“有冇邀请你去“恒大歌舞团”？”大刘说：“第一，真系完全冇，我发誓！第二，好多大陆朋友最兴用女色嚟Please男人，你认为大陆朋友用女色嚟Please我Work唔Work呀？唔Work囉我同你讲，讲完啦，𠮶啲咁嘅嘢第一，虽然我今日又老又企都企唔稳，我都唔系要识𠮶啲咁嘅……有冇睇𠮶啲相呀？个个箩柚都着咗打底裤，都好大个箩柚，我见到啲相咋，我未见过啲歌舞团。每个人做生意方式都唔同，起码你冇乜听过我揾班靓女出去应酬呢啲商界朋友，个个Style都唔同。”
其后记者再问：“同朋友倾偈有冇发现新投资机会？”
大刘说：“喺今日真系有投资新机会，真系要小心小心又再小心，因为今日做生意环境好恶劣，好似今日睇新闻东涌𠮶块地一张标都冇人落，系十年内第一次，有个地产界资深人；第一贵，第二供应多，都唔知买咗能够用咩价钱卖、卖唔卖得出，做生意都系计数咋嘛，好似我呢只表、呢个电话用100蚊做，我可能好有把握卖200、300蚊咁咪做囉，我100蚊成本买个手机，我都唔知卖到80定70蚊，咁我点会去做呀，做生意就系咁现实，当你有钱赚，无论卖鱼蛋、车仔面都有人做啦，因为易揾嘛，唔好讲到咁远，我想讲呢叠嘢（指网上假新闻），唔该你睇吓。”
有记者提到近日卖地市场。
大刘直说：“第一，讲句坦白啲，我有钱入都唔敢入，何况有钱都用嚟守门口啦，你睇吓美国今日个市点跌我唔知啦，个联邦储备局长又话如果发现通涨压唔到，佢毫不犹豫会加息，所以昨晚美股先跌，香港都跌啦，啲地产股都跌到好犀利。（你话有钱都用嚟守门口，手上啲艺术品会否拣时机出货？）呢啲讲Timing（时机），唔好价你出都冇用，唔通你贱价卖呀？如果好价就唔理经济好唔好，我都照卖啦，即系而家个热潮过咗，人哋幅画可以卖到2亿几嘅，佢卖得1.7亿，咪Timing问题囉，所以呢个唔关经济好唔好，系Timing问题。”
记者问到现在香港经济差，有无建议，大刘说：“我唔识答你，亦唔敢答，因为牵涉到政府嘅嘢，做官梗系叻过我哋啦，点解呀？个官字点写呀？有几多把口呀？（点睇香港楼市？有咩建议畀市民点做？）我点有资格讲呀，论辈分论size个个都叻过我哋，咁我哋点有资格讲，系咪先。（楼价会继续跌？）唉，我个人觉得呀，唔应该讲我都讲，如果政府再唔做番啲好嘢，即系啲措施，我大胆讲，冧咗都唔系咁易救得起。”
不过大刘续说：“但政府又好惨，佢撤辣又惊，唔撤又惊。举例有人希望香港市民住得大啲舒服啲，你有钱可以住25万呎嘅屋，冇钱100呎㓥房四、五个人都要住，咁究竟中央系想楼价跌，等㓥房嘅人可以住阔啲舒服啲？呢个好矛盾架㖞，所以我哋真系唔知，我哋唔系做政治做官，点知上面同香港点谂，几时轮到我讲嘢，我而家talking too much喇。”
16：30 大刘被问到除了开记者会外，还会如何反击吕丽君？大刘说：“太太叫他不要出来开记者会，不用理会报道，不要为贱人劳气。”大刘也坦言，开记者会会影响身体，说话伤身。“会否采取法律行动？”记者问。他则说不会，又爆对方有次在半夜11、12时揾人拿民事传票给他，他又说“咁贱咁衰嘅人第一次见”。
记者再问他：“咁张传票内容系？”他即说：“咁我梗系唔方便讲。（问你攞钱？）唔系，总之唔方便讲。”大刘还笑言对方扮好nice、乜都唔知，更模仿女性声说：“真系无㗎，我无呃你㗎。”
大刘续言：“你哋咁多咁后生，我由几岁𡃁仔瞓地下到今日，我见坏人都见唔少，但咁X贱咁X坏嘅人，都系第一次见。”此时有记者问：“坏过凯婷？”大刘显得有点一头无绪：“吓？坏过咩？咩凯婷？”记者解释是潮语，意指好坏嘅女仔，大刘说：“我唔知，真系唔识呢啲嘢，我呢啲又老又out，而家识喇，但我都唔知咩意思。”记者续说：“食烟就系坏，佢（凯婷）食够两支。”大刘：“咁你认为食烟坏唔坏，你话食白粉、食可卡因，定系食烟坏吖？”
有记者问：贱人变坏之前有无劝过佢？
大刘：“梗系有，但系有用咩？唉……我剩系讲佢全家都系纳米型、纳米型嘅贼仔，全家。（你最后一次见佢系几时？）我都唔记得啦，点会记呢啲嘢。”大刘又表示失实文章是今日同事给他看：“我唔识睇手机、唔识睇电脑；系今日公司啲同事print畀我睇，我睇到好嬲，都唔知咁大单。”
刘銮雄记者会现场照片：
16：20 大刘大赞甘比听佢话，又指自己有幸今日开这个记者澄清：“我今日仲有得say，陈凯韵肯听我说话，我3个仔女都肯听我说话，答完你未吖？你清唔清楚我意思？我而家突然话呢个哥哥姐姐，话佢几醒目，‘老婆送1000万、100万畀佢’，佢（甘比）一定会照做，你听唔听得明我意思？因为佢哋好清楚知道啲钱系我好辛苦赚返嚟畀佢哋，唔系佢哋赚㗎嘛，佢系一个正常人，系咪应该质疑我意思先？你头先答我问题，我答咗你㗎喇。
及后在场记者提问：“但你一定唔会分畀某啲人？某啲贱人？”
大刘回答说：“贱人梗系唔会啦！你呢个问题都有少少问题啦！我长命一万岁都冇机会啦！佢实破产㗎！贪到死，乜嘢都要借，你睇佢买𠮶个晋环，畀10% deposit，畀15%政府！你够姜嘅，你畀晒现金啦！我见啲有钱佬老婆畀现金，收租唔驶惊个payment吖嘛，但畀10%deposit，畀15%政府，你话系咪傻㗎？问题都唔系问题嚟嘅，你话系咪傻傻哋吖。”
现场记者再问：“𠮶个人边个投资蚀得最多？”
他又说：“我同你讲吖，乜嘢投资都有，佢傻㗎嘛，边度识投资。佢以前同我讲伦敦买咗啲物业返嚟，全部都系作出嚟！我而家够话美国白宫都系我负责起㗎，任我吹，你信唔信吖？我而家想呃你啊，靓女，你想住伦敦白金汉宫，定华盛顿嘅白宫？你信唔信吖？我谂全世界1万个有钱佬都买唔到呢两栋物业。佢讲大话唔使眨眼，出口成诗㗎！”
现场记者再问：“佢啲仔女知唔知佢啲衰嘢？”
大刘说：“I really don't know！我真系唔知，佢好识洗脑㗎。以前有个伙计退休，我谂住畀笔退休金，又呃咗我几百万，后尾我知道条友根本无收过钱，呢啲咁嘅钱都偷嘅！好多呢啲咁嘅钱，一支牙膏、一张单都claim3次，呢句说话我作出嚟嘅话，我绝子绝孙，七个仔女养唔大啊！”
记者再问：“最近一个月有无改遗嘱?”
他再爆料：“我早排一早分咗，我而家要再改，都要老婆执行我嘅意思，你听唔听得明啊？我而家自己乜嘢都冇！但系我相信我呢个老婆陈凯韵，叫我做乜我都会做。佢唔止牙膏claim三次，喺起级市场地下啲单，佢都执嚟claim，你估我唔知咩？（记者再问：你点知佢执单？）我哋会计部check单check得好紧㗎！即系你话买眼镜，系咪你戴紧？佢最擅长系点呢？买咗个名牌袋之后，平价卖返出街。我记得40几年前去夜总会，啲舞女最钟意揾老衬。5千蚊买日本时装，我就收返4千蚊现金，时装舖就剩袋1千，40年前好兴呢啲嘢㗎。”
【相关阅读】：刘銮雄记者会丨大刘爆有人一支牙膏一张单分3次claim：再喺超市执单嚟claim
现场又有记者问：“到吕丽君的两个子女已经长大，会否独自生活？”
大刘：“你问得真系好，我真系想拥抱你，唔系想非礼你啊。依家个仔得13岁，如果佢18岁，有自己独立可以选择，佢想跟我住，就同我一齐住。（记者问有无听过两个子女口风？）记者姐姐，人会变㗎嘛，我今日最爱嘅你，听日我就唔知喇，大家都识讲呢啲说话。”
16：10 大刘继续炮轰吕丽君：“数目字系边时？以前买块地万几蚊，食碗叉烧饭7毫子，依家边有？唔同时间数字就唔同。佢系纳米型小贼，成家都系。买埋啲Accumulator，I'll kill you later！佢买晋环，人哋一次过畀钱买，佢10%做deposit，15%做stamp。佢无脑㗎，做鸵鸟，以后再唔会救佢，再无关系。我打畀仔女时，佢就搭嗲，你估我会唔会听佢电话？我出院时，佢见我未死得就扮Close，我即刻同陈凯韵结婚，点知要分身家先有保障。我开记者会之后一星期，我同律师讲宁愿分错都唔愿畀佢得益。可能我斗零都唔分，可能留畀我老婆同佢三个仔女决定，怕俾佢挞埋。有冇睇早排《东张西望》？有个肥女人嫁咗四次，间公屋都呃埋个仔。陈凯韵肯听我说话，三个仔女都肯听我讲话。”
16：00 大刘再为分身家传闻解说：“又话全部财产转畀个仔，甘比踢出局，点解要咁讲呀，自己开心囉，讲就有人信，有一个重申，阿陈凯韵我老婆从来无同我蚀过钱，睇过金融投资，佢艺术赚到钱。点解叫我唔好理，今次开记者招待会影到某个仔同女，我都无办法，即系如果要入屋杀我屋企人，我跛咗瘫口咗，我都垂死挣扎，垂死嘅反抗啦！”
他续说：“不过今日见到咁多叠嘢，好在嚟开呢个记者招待会，我头头睇嘅第一页啫，睇到咁大叠嘢，火都嚟Q埋，系咪呀！危机关头、艺术品套现，如果你有记性嘅，阿Su呀，甘比卖（嘢）系几多年前呀？（十几年前呀），唔系卖出去呀，应该都3年前呀，（系呀差唔多！）我哋买返嚟700至800万，卖2亿几，你卖唔卖啊？𠮶时咁差㗎，有某人幅画仲靓过佢，如果𠮶时我哋卖2亿几、3亿，佢都好唔抵得，点解佢𠮶幅靓过我哋𠮶幅，卖1亿7，因为timing问题啫，艺术品呀，楼价你五年前买楼呀，咩价钱你都知啦，大家知咩环境，都要老作老屈，都系啲人作出嚟。”
大刘又指网上传闻离谱，直言恐怖再不回应便有人会传他“死咗”：“我再唔出声，有个朋友真系以为我有事就嚟死，打电话，大哥你冇事丫嘛，我有咩事呀？网上传你就嚟死㖞，其实我依家同你讲嘢把声，似唔似就嚟死。我长话短说，呢叠嘢佢哋个个都有，你见到啲咁嘅嘢，咁有咩人会做呢样嘢出嚟呢，事实冇咁嘅事嘅，边个得益呀，自我陶醉囉，我够想做呢个宇宙最有钱𠮶个，如果成个宇宙灭亡咗得我一个，得我唔死嘅，我咪最有钱囉，其他三个都死晒咯，我幻想咁，咁边个会作呢啲新闻出嚟呢，一个人自我陶醉，到底有冇人信，我真系希望我一年前，唔帮佢单破产。”
现场有记者问：“系咪后悔帮咗佢？”他即说：“系，我承认呀！做人呀唔好讲你哋丫，我由细个𡃁仔到今日呀，可能我长命多10年、15年，我都会做错嘢，都会后悔丫，啱唔啱先。”
15：55 大刘又指：“（啲传闻）系好严重失实，听闻佢请咗网上打手，请咗以前《忽然一周》总编辑带呢队人，专系负责做呢啲嘢。讲到佢帮我损失百几亿，又话个仔乜乜，仲话我就嚟死。我早几日约朋友食饭，话出面传我身体好差就嚟死，你睇我而家个似唔似就嚟死？可能畀人激死就有，但我自己身体系冇嘢。如果我再唔出嚟，可能传我死咗。”
【相关阅读】：刘銮雄记者会丨暗指吕丽君请人做打手造谣 撑太太甘比助赚过200亿
大刘随后再疑似用“贱人”一字讽刺吕丽君：“呢个贱人最近去新加玻，冇人识佢㗎，自己招摇撞骗，人哋见到佢都惊咗佢。我够可以喺电视同拜登合照、P图话佢企喺我隔嚟啦！以前台湾有套电影叫《养鸭人家》，你知唔知鸭同鹅分别，鸭只系做女人生意，鹅就男又做女又做。呢啲系佢嘅私生活佢嘅事，唔关我事，我点解咁讲呢？你睇吓呢叠嘢，完全0.001事实都冇，夹硬作出嚟老屈，我再唔出帮即系默认。我老婆陈凯韵使乜理佢吖，佢自我陶醉之嘛，等于咁，有一日有人要杀我屋企人，唔好讲我系咪跛，我系跛系残废啊，我都要保护屋企人！啲人造谣造到咁，传到我就嚟死。”
他又指：“啲人话我娶咗陈凯韵，佢阿妈换咗个肾畀我，所以我要报恩娶佢做老婆，哈哈哈！呢啲真系好好笑，哈哈！我换肾都揾个后生啲吖，揾个老人家换，希望一年换一次咩。呢啲谣言全部都系呢个人作出嚟，有网络打手。佢好精㗎，喺香港出好易俾人睇到佢出，所以喺大陆出，我check晒出嚟。我见完呢叠嘢。”
15：50 大刘续指甘比没有为他带来几百亿损失：“简单讲，陈凯韵从来冇帮我损失过任何钱，冇损失百几亿，佢同我赚超过200亿艺术品上收入。如果有损失，都系我自己决定，完全唔关佢事。但啲人点解咁讲呢？“800亿落空”，呢啲好似真嘅一样都系假嘅；仲话我将啲财产畀个仔，完全都系冇嘅。”
15：40 大刘澄清太太甘比从来没有为公司损失200亿元，“佢同我赚超过200亿艺术品投资就有”。大刘又指，所有投资损失都是他自己，所有有关他投资损失的报道，都是虚构及严重造谣。
大刘在记者会上表示：“后悔成年前帮个贱人（吕丽君，现名吕姵霖），当时唔想佢破产睇返转头，帮佢破产好过，点知佢有自己网上打手，做而家嘅嘢。”大刘解释，吕丽君聘请前杂志总编辑，做网络打手。他指，甘比曾经劝阻他不要澄清，怕影响子女，但他称“如果有人入屋杀我屋企人，我跛咗、瘫咗，都要做嘢。”
15：30 刘銮雄记者会约在下午3时半开始，大批记者在门外排队进入会场，所有记者均需戴上口罩，现场更有工作人员向记者派发口罩佩戴，又有不少防疫用品，大刘座位旁边更有不少白毛巾。
【点击睇大刘与甘比】：
【刘銮雄今年初开记招爆“十大金句”】：
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
