【曾智华专栏】老婆要求我退休

老友聚头叹美食，本应是开开心心的，但全晚“专业文”无晒心机，肯定有事。
　　
“阿文，系咪身体出问题？点解闷闷不乐？”
　　
文哥今年六十九岁，日挨夜挨，早早个样残到似七十五岁，出事绝不奇！
　　
“唔系呀碌Sir，而系⋯⋯唉！上周同老婆睇电视新闻，刚刚播李克强突然游游吓水死咗。李克强只退休几个月，比我细一岁，咁样话去就去，更加强老婆大人的⋯⋯”佢欲言又止。
　　
究竟系乜？“专业文”其实乃富家子弟，老窦早早剩下大把，但佢乃工作狂，开咗档生意自己一手一脚做，相当有满足感。正因有满足感，故日做夜做也不觉累，不过，当然间中冷落娇妻，畀另一半哦到飞起。
　　
“老婆大人指示，我出年一定要退休，将档生意或卖盘或结业，然后陪佢好好环游世界一次，以免我随时变李克强，咁就终生抱撼㖞。”
　　
从文哥的表情及语气，唉，大家认识咁多年，当然知道佢老不愿意退休啦，但又觉老婆大人有道理，唔知点回应，于是近日只好晚晚揾老友饮闷酒。咁搞，健康肯定受影响。
　　
小弟认识的“老”男人，不少也有同类问题，正是另一半逼自己做这样那样唔想做的事，包括戒烟、戒酒、戒食乜食物，当然，也要求戒赌马赌波⋯⋯其中一样，争议最大，为要求移民。
　　
“大佬呀，都咁老嘞，所有童年好友皆在香港，你叫我走去人哋个国家做外国人为乜？人哋政府关我乜事？冰天雪地生活有乜好过⋯⋯”
　　
以上说话，大家只敢同老友讲。
　　
回说“专业文”，临走有点醉也有点悲：“碌Sir，你最明白我。日日做开喜欢有意义的事唔做，走去游手好闲，第二个唔知，我则肯定快死过李克强！”

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。