【曾智华专栏】假如潘顿消失了

越来越相信，若香港马圈冇咗“软硬鞭”潘顿，将有一番新景象，可能投注额会回升！这是一个推断，发生后才可印证。点解咁谂？因身边的马迷日怨夜怨，怨“潘顿现象”，唔知佢想点，搞到投注赛马热情大减。
　　
好马畀佢霸晒，但又唔知佢出“软鞭”定“硬鞭”。“软鞭”一出，输死普罗马迷；“硬鞭”？通常胜出都冇肉食，毫无满足感可言。
　　
小弟又点睇？简单，任何一个表演或竞赛圈子，必须生生不息才会有吸引力。
　　
雷诚、马佳善、韦达及莫雷拉初来时，就制造出一种投注的兴奋感。不过，任何“赢马机器”多见亦常人外，总觉得日渐变古灵精怪，当马迷白痴。当然永远有人好似好化咁话：“赛马就是如此！”
　　
咁讲即是周街打劫强奸，然后你就话“正常社会”就是如此。咁系咪当执法者死嘅？
　　
潘顿日渐令人厌倦乃事实，若佢能够行开吓，对佢自己及对香港马圈皆是好事。
　　
一如足球圈，若年年都是美斯及C朗攞金球奖，咁个颁奖礼必定收视率越来越低。幸而美斯都知攞埋呢届就应“够皮下台”，轮到麦巴比及夏兰特等天才球员上位。
　　
香港马圈冇咗潘顿，大量好马有机会畀其他骑师策骑。骑士如武士，冇好剑在手，会飞都冇用！一有好剑，布文及田泰安当然起飞。另外，仍未见底的钟易礼、霍宏声、董明朗、艾道拿、艾兆礼也会升呢！
　　
周三提供两只，“木火同明”六倍胜出，执返身彩。
　　
明日沙田美女如云，为支持美丽系，一于只只十蚊W！妇女银袋三级赛，让磅。选三匹：“直线力山”同程两出两胜；“健康快驹”董明朗试闸冇得骑，潘顿霸住；“当年情”上仗千八米输少少，矛头今仗！