【曾智华专栏】老婆出现大威力

星岛集团旗下的直播节目《赛马日在线》，小弟不停推介马友睇，点解？过瘾囉。
　　
马会官方节目画面最靓，资料最齐，但主持人个个四平八稳，唔敢乱讲不止，搞吓笑都冇，虽未算沉闷，但赛马是娱乐一种，过分正正经经，有点赶客。
　　
《赛马日在线》胜在几位主持各有角色又够生鬼，黄以文老总负责指挥交通维持秩序，有主持过位即兜。安西教练大情大性拍烂枱，我见过佢真人，右手曾驳骨，因曾拍到断咗，真夸张。栋哥畀贴士马虽然赔率热啲，但实牙实齿经常中。两位女主持Win姐与叻姐斯斯文文，冇烟屎声，原来叻姐为艺术歌曲爱好者，不时演出，难怪气质高雅。
　　
最“鬼祟”零零亨，负责𥄫实沙圈，最煞食为睇人妻，即系乜？即系凡骑练有老婆大人现身捧场即报，因多数搏甩髀！
　　
心理好易解释，男人个个爱威，尤其自己女人面前，边个想瘀想输？故此零零亨一见骑师老婆落沙圈，即报，多数中。呢呢，上周日潘顿赢两只，两场皆见佢老婆大人在沙圈现身，与老潘吱吱㖊㖊。
　　
最可惜当日零零亨走咗只大鸡，为漏提意大利籍猛将艾兆礼，老婆出现，第三场W出“我为您”，立即与老婆大人嘴个不停。哗，仲唔系“英雄好汉，胸怀大义”？果然，“你知我得”又入Q，然后尾场更犀利，杀埋二十七倍大冷“幸运有您”！
　　
零零亨，你咪只识𥄫潘顿老婆得㗎！
　　
好嘞，今晚又有九场玩。
　　
今季马迷最高兴为见到本地牌仔钟易礼，骑功脱胎换骨，表现眼前一亮。不过，可能师傅告东尼唔想佢过分头大，冇乜好马畀佢骑。
　　
一于捧佢两只外线马——“精妙星”及“最佳拍档”啦！