【曾智华专栏】尊贵客户畀银行玩残

边个系尊贵客户？我囉！边间银行？小弟由孩童时代入钱罂开始，结缘六十多年，更持有佢股票的最大银行。
　　
点解畀佢玩残？其实已经玩咗我好多次，相信不少读者也有相同经验，执笔前又再玩一铺，真顶佢唔顺。
　　
时光倒流四十年前，有日到银行办点事，一位礼貌周周职员游说：“曾先生，你乃敝行长期客户，为进一步得到更优质服务，不如申请成为‘尊贵客户’啦，只要经常保持有总值一百万元的存款、债券及股票已可，完全免费！”
　　
“有乜特别呢？”引起我好奇。
　　
“包括专柜提供更快捷服务，毋须排队，又可在客厅设计的大堂享受咖啡画报，一切免费！”佢递上申请表，令我难以抗拒。终于四十年前成为“尊贵客户”。
　　
起初真的几好服务，但随着时日过去，“尊贵客户”人数渐多，而银行揾钱目标不再以基本服务为主，醒目的职员调晒去推销“食大茶饭”的金融产品，尤其是客户即买即被斩的基金（我领过嘢，一买，先斩佣金，再斩手续费）。
　　
好嘞，佢点玩我呢？小弟喜欢“打簿仔”，但银行望推电子化，咁点“赶簿仔客”呢（个人经验作推测）？就是搞到本簿仔条磁带成日坏（以前的绝不如此，但约五年前的新簿仔𥔵带劲差），一坏就要到柜枱修理，次次排队，烦死你为止。
　　
呢呢，昨日我本簿仔又坏。攞去九龙最富贵的又一城分行尊贵客户部，要求职员搞搞。
　　
“麻烦排队，等叫号码！”
　　
“小姐，几十人㖞，可否帮手过一过磁带机啫！”“唔好意思，冇人手！”
　　
就咁，我等咗几耐？一小时！职员原本只需拉一下磁带机的服务，却玩“尊贵客人”，逼呆坐一小时，系乜服务态度？