【曾智华专栏】两套中途离场电影

今日呢篇稿，刻意等两套片上咗一个星期才刊出，以免被指“阻住人发达”。
　　
为支持电影业，差不多套套新片，我尽量入场。好的，由头睇到尾，再极力推荐老友、读者捧场；唔好的，一如帮衬食肆，出少句声，反正赶客的店迟早都会执笠，毋须再加把声也。
　　
电影又如何？好与坏，有时几个人口味。例如，若是你充满爱国情怀，自然地觉得“主旋律电影”套套佳作，必须捧场。不过，遇上班西方式教育长大的“番书仔”，可能感觉完全不同。单单睇主旋律电影在香港的平均票房，大家已略知一二，毋须细表。
　　
上周入场睇咗两套电影，两套皆中途离场，因唔想再睇落去。
　　
第一套为《扎职2》，有黄宗泽、陈家乐及张继聪孭晒飞，极度落力，幕幕瞓身搏老命。
　　
点解我顶唔顺中段走人？因此片百分百黑帮电影，为力求真实及充满刺激，一开场已经连场劈友，你劈我，我劈你，血肉横飞。
　　
系呀，好紧张呀。不过，当你追来追去猛斩，斩足三十分钟后，老实讲，已经有点恶顶。唔知班江湖中人会否好享受，甚至代入剧中人。不过，我呢类普通观众真系“斩到滞晒”，最后决定提早拜拜。
　　
此片最令我“眼前一亮”，为现职大状的中年型男黄锦燊，竟愿意客串做黑社会老叔父。究竟佢点解要接拍呢？完全难以理解。
　　
另一套电影为改编自真实个案的《玩谢华尔街行动》。讲述一宗罕有散户打大鳄的揾银故事。
　　
散户，从来是大鳄的点心，绝不会偶一为之畀你偷鸡，就改变整个生态。
　　
点解我睇睇吓走？因顶唔顺一班American Smart Ass的行径及价值观，冇乜啱或错，只是冇兴趣睇！