【曾智华专栏】唔认识佢？新嚟？

今日先唔讲马，讲人！讲边个？正是TVB现任行政主席许涛及前任董事总经理何定钧。
　　
未讲两位前，先将时光倒流四十年。其时内地仍非常贫瘠，但香港经济已开始腾飞。正常现象，大量偷渡客由深圳游水来香港寻找黄金梦。
　　
当时小弟不少警界老友负责拘捕偷渡者，有的就在边界捉，有的在市区发现可疑的，立即盘问。
　　
“碌Sir，其实偷渡者好易睇得出，单单外形，包括发型、衣着及神情，一睇就知！进一步查证件及‘𢭃’几句，十次十次中。证件可以是假的，但问香港家传户晓的人物，唔知，一定系偷渡嚟！例如《欢乐今宵》边个系‘上海婆’（沈殿霞）？边个系‘大白鲨’（林建明）？又或最犀利本土骑师系边个（告东尼）？以上三位，只要你系香港人，绝唔会口哑哑！否则拉得！”
　　
点解我谂起警察老友旧话？因近几个月，全个传媒皆听到TVB即将有Major Shake Up（大震动，大换班）。系真唔系真，稍后会知。但大家当然唔会爆，事关重大也。
　　
不过，你唔讲啫，总有人高调抢先报道。好难得，记者揾着传闻中的主角之一、前无记“老顶”何定钧。小弟识“何老大”几十年，佢乃谦谦君子、好好先生，从不讲花话，竟然直认传闻，咁即系⋯⋯
　　
点知报道出街后，TVB发新闻稿：“主席许涛先生并不认识何定钧先生。”
　　
唔系啩？电视界“教父”你都唔识？奇哉！且看事件如何发展落去，非常有趣㗎。
　　
讲返今晚跑马地赛事，三班跑千二米最有研究价值。潘顿骑热门“闪电”好档，但我估佢倒灶。反之，三只劣档的可以杀低佢，包括九档“钫糖武士”、十一档“炯炯有神”及初出马十档的“骏步腾飞”。后三只买Q、PQ啦！